Atassut: Royal Greenland akiliisinnaajunnaarsinnaavoq

Nunatsinni suliffeqarfiit annersaat Royal Greenland Naalakkersuisunngortitsiniarnermut atatillugu pingaaruteqartumik inissisimalerpoq. Sermitsiap nittartagaani oqaatigineqarpoq, Naalakkersuisunngortitsiniarluni isumaqatigiinniarnerni, Royal Greenlandip ajalusuulerneranut Atassut akisussaatinneqarsimasoq, tassami naalakkersuisuni tunuartuni Atassutip aalisarneq akisussaaffiginikuummagu. Taamaattorli Atassutip siulittaasua Finn Karlsen tamatumunnga tunngasunik ilisimasaqannginnerarpoq.

- Paasivarput Namminersornerullutik Oqartussat Royal Greenland A/S-ip aningaasatigut ajortorujussuarmik inissisimaneranik 2008-mi novembarimi ilisimatinneqarsimasut, kisianni uagut eqqumiigeqisatsinnik ernumassutigeqisatta eqqortuuneranut uppernarsaat, uagutsinnut naalakkersuisoqatigiinnut Siumut/Atassummut saqqummiunneqanngisaannarpoq, Finn Karlsen Sermitsiap nittartagaanut oqarpoq.

Sermitsiap nittartagaata paasisai najoqqutaralugit Royal Greenlandip akiitsuisa milliardilikkaat qanoq aningaasalersoqqinneqarnissaat aningaaserivinnit suliffeqarfissuup attavigisaanit peqataaffigiumaneqannginnera ajornartorsiutaavoq.

Taamaattumik Atassut Naalakkersuisunngortussanut, Inatsisartut suleriaasianni paragraf 36 najoqqutaralugu apeqquteqaateqarpoq, Royal Greenland A/S-ip aningaasaqarnera qanoq inissisimanersoq.