Atassut: Nukissiorfiit ingerlatseqatigiiffinngortinneqassanngillat

Aningaasaqarnermut naalakkersuisortaaq, Per Berthelsen ataasinngormat oqarpoq, nammineq isummani naapertorlugu Nukissiorfiit ingerlatseqatigiiffinngortinneqarsinnaasut. Tamanna partip naalakkersuisoqataasup isumaqatiginngilluinnarpaa. Atassutip aningaasaqarnermut oqaaseqartartua, Augusta Salling ullumi oqarpoq, siunnersuut unitsinneqassasoq, Naalakkersuisoqatigiit isumaqatigiissutigigaat.
Allattoq Louise M. Kleemann
oktobarip 01-at 2008 13:35

Inatsisartut oqaluuserisassaninngaanniit peereerpaat, aamma naalakkersuisooqatigiit isumaqatigiissuteqarnertik tunngavigalugu, qinnutigineqarmat oqaluuserisassaninngaanniit perneqassasoq.

Naalakkersuisooqatigiit isumaqatigiissutigaat Nukissiorfiit aktieselskabinngortinneqasanngikkallartoq?

- Aap, tassa isumaqatigiissutaavoq. 2009-mut aningaasanik iantsisissap suliarinerani allanngunnginnissaa isumaqatigiissutaavoq, taava aningaasalersuinissamut atatillugu, avataaninngaanniik aningaasanik atorniarsinnaaneq misissorlugulu eqqartorneqartussaavoq, Augusta Salling oqarpoq.

Taamaalilluni isumaqarnarsivoq partiit naalakkersuisuutitaqartut Siumut Atassullu, aningaasaqarnermut politikkikkut assigiinngitsorujussuusut, kisiani Augusta Salling taama isumaqanngilaq:

- Isumaqatigiinnginnermik tunngaveqanngilaq. Naalakkersuisooqatigiit isumaqatigiissutigaat Nukissiorfinnik aktieselskabinngortitsiniarneq oqaluuserisassanit peerneqassasoq. Aningaasaqarnermut naalakkersuisunngorlaap isumaqatigiissutaareersoq eqquteqqeriaraluarpaa oqaloqatigeqqaarnata, Atassutip aningaasaqarneq pillugu oqaaseqartartua, Augusta Salling, taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq