Atassut corona, nikanarsaaneq Fleischerilu pillugit: Naak nunatta siuttua?

Nutartigaq: Nal. 12:20  allaaserisap naanerani pisut itisilerneqarput.

Nunatta siuttua, Kim Kielsen, tusagassiutini piffissami kingullermi oqaseqarneq ajorpoq.

Nikanarsaalluni tiinganiartoqartarnera, nualluut coronavirus partiimilu Siumumi eqqissiviilliortoqaqattaarnera. Pisuni taakkunani Naalakkersuisut siulittaasuat tusagassiuutinut oqaaseqanngilaq.

Taassumalu nipaappallaarnera Atassutip siulittaasuata maanna isornartorsiorpaa. Tamanna naammalerpoq, taanna qarpoq.

- Partiiminut siulittaasutut, kiisalu nunatta Naalakkersuisuisa siulittaasuattut pisuni ilungersunartorpassuarni oqaaseqannginnera naammalerpoq, Aqqalu Jerimiassen tusagassiuutinut nalunaarummi taama allappoq.

AAMMA ATUARUK Henrik Fleischer Siumumit tunuartitaasinnaanerminut: Paatsooqatigiittoqarpoq

Inuiaqatigiinni ilungersunartunik pisoqartillugu Naalakkersuisut siulittaasuat nipaarluuallaarnerarpaa:

- Nunatsinni corona virus pillugu ernumaneq annertuvoq, oqaaseqaranilu. Henrik Fleischer Siumukkunniit anisitaasoq uteqqittorlu pillugu oqaaseqanngilaq. Kiisalu allattaanerup soraarsitaaneranut, minnerunngitsumillu kanngunartunik killissanillq qaangiisoqartarneranut oqaaseqannginnera paasiuminaatsilluinnarpara, siulittaasoq allappoq.

Taassuma Nalakkersuisut siulittaasuata coronavirusip nunarsuarmi siaruaakkiartornerani aamma oqaaseqarnissaa maqaasivaa.

- Siuttuuniaraannimi suliat annernarsinnaasut aamma suliassaapput qimaaginnarnani.

Siumut ulluni makkunani assoralisimaarfiusoq

Siumumi sapaatip akunneri kingulliit assigiinngitsunik pisoqaqattaarpoq.

Partiimi allattaanerusimasoq Mikael Petersen nikassaalluni tiinganiartarnerarlugu arnat qulit sapaatip akunnerata siuliani allataat avammut saqqummerput.

Mikael Petersen nikassaallunga tiinganiartarnerarneqarnini pillugit KNR-imut oqaaseqarumanngilaq, Ekstra Bladetimulli nassuerutigaa suleqatini nulorortarnikuusimallugit.

Pisunut inunnut ataasiakkaanut tunngasunut oqaaseqarsinnaanatik Siumup aaqqissuusaanerani siulittaasup tulliata Evelyn Frederiksenip nalunaarutiginikuuaa.

Erseqqissarluguli "Siumumiit kanngutsaatsuliortarnerit suulluunniit akuersaarsinnaanngilluinnarmagit", Kim Kielsenili pisoq pillugu oqaaseqanngilaq.

Nikassaalluni tiinganiartarneq ukkatarineqalinngitsiartoq Siumumit Inatsisartuni ilaasortaq, aalisarnermut ataatsimiititaliami siulittaasuujutigisoq Henrik Fleischer aamma oqallisaangaatsiarpoq.

Taassuma aalisarnermut naalakkersuisumut Jens Immanuelsenimut tatiginnikkunnaarluni tusagassiuutinut allagaqareersorlu Siumumi eqqissiviilliortoqalerpoq.

Partiip siulersuisuunerinut pisoq pillugu Henrik Fleischer allagaqarpoq. Tassanilu paatsoortoqarsimanera pissutaalluni Henrik Fleischer partiimit ilaasortaajunnaaraluarpoq.

Henrik Flerischerillu Siumumi malittarisassat ilisimasimagit taamaaliorsimanini nassuerutigaa, kingusiinnaalu utoqqatserluni.00:03:05

Pisumi tassani partiimi siulittaasup tullia Karl Kristian Kruse tusagassiutinut oqaaseqartuuvoq.