Atassut Karl Lyberthimut tatiginnikkunnaarpoq
- ATASSUT-mmit paasisavut naapertorlugit, siunnersortimik atorfinitsitsineq Hans Enoksenip aalajangerneranut sakkortuumut pissutaanngilaq, pissutaasorli tassaavoq, aalisarnermik inuussutissarsiuteqartunut Naalakkersuisut suleqatiginnikkusunnginnerat, Gerhardt Petersen, allakkami aappassaanni ilaatigut allappoq.
Ukiaanerani ataatsimiinnerup aalassassimaarfioqisup kingorna Atassutip neriuutigisimagaluarpaa aalisarneq pillugu oqallinneq eqqissisimanerulissasoq. Tamannali pinngitsoormat Atassutip Aleqa Hammond qinnuigaa, Aalisarnermut, Piniarnermut Nunalerinermullu maanna Naalakkersuisoq inuttassavimminik inuttaqarnersoq eqqarsaatigeqqullugu.
Atassummit allakkat aappaanni ammasumi allakkat eqqaasitsissummik naggaserneqarput: Allakkat siulliit naalakkersuisoqatigiinnut septembarip ulluisa 23-annili nassiunneqarput.
- Atorfinitsitsisarnernut soraarsitsisarnernullu atatillugu Namminersorlutik Oqartussat uppernassusaat illersortariaqartoq, allakkani taakkunani piumasaqaatigaarput, atorfinitsitsinermi qanittukkut pisoq innuttaasut akornanni akerlerineqaqalunilu aalassatsitseqimmat, ATASSUT-mmiillu isumaqarluinnaratta, tamanna Naalakkersuisunit qisuariarfigineqassasoq.
Inuit Ataqatigiit Inuusuttai aamma naammaginnikkunnaavipput.
- Naalakkersuisut, Siumut siuttoralugu, 2014 aallartippaat, Naalakkersuisunut siunnersortimik atorfinitsitsitsiniarlutik kaajallaasitamik allakkiorlutik. siunnersortimillu atorfinitsitsineq siulleq ilaqutarisanik salliutitsinertut taaneqarsinnaavoq, Inuit Ataqatigiit Inuusuttaat tusagassiuutinut allapput.
Inuit Ataqatigiit Naalakkersuisut isornartorsiorpaat, Aleqa Hammondip inooqataanik atorfinitsitsimmata. Tamanna assuarnaqaaq, allapput, nangillutillu:
- Tom Ostermann inuttut apeqqusernianngikkaluarparput, taannami allagartarissaaqaaq, kisianni Naalakkersuisut Siulittaasuannut taama qanitsigisumik atorfinitsitsineq ingasappaalaaq mamaatsoornarlunilu, ilaquttanillu salliutitsinertut taaneqarsinnaavoq.
