Atassut: Ikinnerussuteqarluni naalakkersuisooqatigiinnit aninerput nuannaarutigeqaarput

Naalakkersuisunut ilaasortat marluk ulluni kingullerni oqallisaasupilussuit aappaat taamaalilluni Naalakkersuisunit aamma tunuarpoq: Aqqalu Jerimiassen (Atassut) Inuussutissarsiornermut Nukissiuuteqarnermullu naalakkersuisuujunnaarpoq Siverth K. Heilmannilu aamma naalakkersuisuujunnaarluni.

Atassut Inatsisartuni marluinnarnik ilaasortaqarpoq, partiilu naalakkersuisoqatigiinnit tunuaraluartoq Kim Kielsenip naalakkersuisoqatigiivi suli amerlanerussuteqartunit tapersersorneqarput.

Qulutannguaq Berthelsenillu suleqatigiinnermik isornartoqartitsinini miserratiginngillaa.

 - Takuarput ikinnerussuteqarluni naalakkersuisooqataaneq partiimut nungusaataalluinnartoq tamannalu aaqqinniartariaqarpoq inatsisartunut ilaasortaatitagut marluk nipituuliornerussallutik suliassaq taannaalerpoq kivitseqqinniarnissaq, siulittaasup tullia itisiliinani taama allappoq.

- Siumumut pituttorsimaniarpallaarneq partiitsinnut siuariaataaneq ajorpoq akerlianilli partiitta milliartorneranut kinguneqartuaannarpoq, takusareerparput tamanna.

Atassut nalunaaqutaq marlunut tusagassiortunut katersuutsitsulerpoq. Katersuutsitsineq KNR1-ikkut toqqaannartumik isiginnaarneqarsinnaavoq.

Jeremiassen Naalakkersuisunut aamma ilaasortaajunnaarpoq

Aalisarnermut naalakkersuispq Nikkulaat Jeremiassen (S) aamma naalakkersuisutut tunuarpoq. Naalakkersuisullu pineqartut marluk piffissami kingullermi perulluliutigineqareersut tamanna pivoq. Naalakkersuisunut ilaasortat marluk piffissami kingullermi assoralisimaangaatsiarput.

Nikkulaat Jeremiassen qaleralinnik aalisapiluttoqarnera pillugu tusagassiorfinnut qinikkanullu assigiinngitsunik nassuiaateqarsimasutut isornartorsiorneqarpoq. Inatsisartut aalisarnermut ataatsimiititaliaata taama nassuiaateqarsimanera isoralugu naalakkersuisoq tatigiunnaarlugu sapaatit akunnerata siuliani nalunaarutigaa.

Aamma Inuit Ataqatigiit, Demokraatit Partii Nalerarlu naalakkersuisoq tatigiunnaarlugu nalunaaruteqarput.

Aqqalu Jerimiassen nunarsuup silaannaata kissakkiartornerata inunnit pilersitaanera upperinagu Sermitsiaq.AG-mut sapaatit akunnerata siuliani oqaaseqarnini pillugu isornartorsiorneqangaatsiarpoq.

Tamannalu pillugu Demokraatit, Inuit Ataqatigiit Partii Nalerarlu naalakkersuisumut tatiginnikkunnaarlutik aamma nalunaaruteqarput.