Atassut: AWG-mut aningaasat innuttaasunik sullissinermut atorneqartariaqarput

- Nunatsinni aningaasaqarniarneq tulleriiaarinikkut pisartussaavoq, aamma isumaqarpunga aningaasarpassuit taakkua pilersaarutigineqartut utoqqartatsinnut inuunertik tamaat Nunarput sullinnikuuaat, taamaammat atugassarititaat pitsanngorsarsarniarlugit aningaasat atorneqartariaqaraluarput, Steen Lynge taama oqarpoq.

Kisianni Kommuneqarfik Sermersuumi borgmester Asii Chemnitz Narup oqarpoq, Arctic Winter Games-imik aaqqissuisuunissamik qinnuteqarnertik, Kommunalbestyrelsemit tamarmiusumit akuerineqartoq, aningaasaqarnikkut akisussaassuseqqartumik pilersaarusiornermik tunuliaquteqartoq.

- Missingersuutinut ukiunullu ikaarsaarfiusunut inissitsiternikuuagut, taamaallilluta aamma 2016-imi unammiuaartitsinissamut akissaqarluta. Kommuneqarfik Sermersuumi borgmesteri, Asii Chemnitz Narup KNR-mut taama oqarpoq.

Namminersorlutik Oqartussat Kommuneqarfik Sermersuullu  aaqqissuinissamut qinnuteqaatertik pisortatigoortumik sapaatip akunnera kingulleq nassiuppaat. Tassanilu siunnersuutigineqarpoq Iqaluit suleqatigineqassasut, sukuutsertafimmik sanatitsinissap akisunera pissutigalugu.

Unammiuaartitsinissamut suliniuteqartut siulittaasuat William Kriegel Kommuneeqarfik Sermersuumeersoq oqarpoq, aningaasartuutigineqartussat 48 millionit koruunit missaaniittut, Kommunip Namminersorlutillu Oqartussat avillugit akilissagaat.

Kisianni Steen Lynge suli isumaqarpoq, Nunatsinni aningaasat allanut atorfissaqartinneqartut:

- Imaattariaqanngilarmi pisuusaarluta ajunngitsuusaarluta aaqqissuissasugut fiisterniaannarluta, uffa ulluinnarni atorfissaqartitagut immaqa tamakkiisumik naammasineqanngitsut, Steen Lynge Atassummeersoq taama oqarpoq.