Atassut: Ataatsimiititaliaq inatsisilerituunik ilaasortaqartariaqarpoq

Inatsisartut ukiuunerani ataatsimiinnertik ullumi nalunaaqutaq ataatsimut nangissavaat, ataatsimiinnerit ulluisa 16-ianni. Oqaluuserineqartussat ilagaat qinigaasinnaanermut ataatsimiititaliamut atatillugu inatsisip atuuttup allanngortinnissaanut tunngasoq, ataatsimiititaliap ilinniagaqarsimasuinnarnik siunissami ilaasortaqarsinnaaneranik siunnersuut.

Siunnersuutip imaraattaaq kikkulluunniit qinigassanngortittut erngerlutik pinerluuteqarsimannginnermut uppernarsaammik piniarnissamut akuersisalernissaannut tunngasoq. Qinigaasinnaanermut ataatsimiititaliap taamaasilluni politimestereqarfimmi Det Centrale Kriminalregisterimit paasissutissanik pissarsiniarnissaa siusinnerusukkut pisinnaalissaaq. Atasssutikkut inatsisartuni ilaasortaatitaasa, ilaatigut Ellen Christoffersen-ip Augusta Salling-illu tamanna siunnersuutigaat.

Ukiuunerani Inatsisartut ataatsimiinnerisa naammassiartulerfianni qinersinermut tunngasut ullumi sammineqangaatsiassapput. Inatsisartunik qinersinermi qinersivik ataasinnaajunnaarlugu arlalinngorteqqinneqarnissaannik Inuit Ataqatigiinnersup Kuupik Kleist-ip siunnersuutaa ullumi aamma aappassaaneerneqassaaq.