Atassut: Angajoqqaat ikiorserneqarnerusariaqarput
Angajoqqaat inuuniarnikkut ajornartorsiutillit pingaarnertut ikiorserneqartariaqarput, Atassut isumaqarpoq. Taamaammat aningaasatigut ikiorsiinissamut inatsisitigut periarfissat naapertuunnersut nalilersorneqartariaqarpoq. Aamma ilaqutariit aningaasatigut ajornartorsiuteqartut ajornartorsiutiminnit aniguiniarneranni annertusisamik ikiorserneqartarnissaat siunnersorneqartarnissaallu qulakkeerneqartariaqarpoq. Atassutip aamma siunnersuutigaa, ilaqutariit aningaasanik aqutsinerat pitsaaneruleqqullugu missingersuusiortarnermik ilinniartitsineq ataqatigiissumik ingerlanneqartariaqartoq.
Tunitsiviit suliffissuillu amerlaqisut illoqarfinni nunaqarfinnilu matoorarneqarnerat Atassummit aamma ernumanartoqartinneqarpoq, tamakkulu namminersortunit tiguneqarsinnaanissaat piginnittut sinnerlugit Naalakkersuisut isumannaassagaat kaammattuutigaat.
Kalaallit Nunaanni CO2-mik aniatitsinerup annikillisarneqarnissaa Atassummit pingaartinneqarpoq, tikkuarpaali suliffissuarujussuarnik Nunatsinni ammaassinissaq mattunneqassanngitsoq.
- Ilumoorpoq CO2-mik aniatitsinerup annikillisarneqarnissaanut Nunarput peqataasussanngorlugu atsiortoqarnikuusoq, aammali ilumoorpoq suliffissuaqarnerup aqqani isumaqatigiissummut sanilliullugu aniatitsinerusinnaanerat nunat akunnerminni pisiniartarnikkut isumaqatigiissutigisinnaagaat.
