Atassut aamma misissueqqusivoq

Danmarkimi naalakkersuisoqatigiit Venstre-t aamma De Konservative-t Atassutip maanna kaammattorpai CIA-p unioqqutitsilluni Nunarput aqqutigalugu tigusanik timmisartuussisarsimaneri pillugit paasissutissat nutaat tunngavigalugit arlaannaannulluunniit attuumassuteqanngitsumik misissuisoqaqqullugu.
Allattoq Noah Mølgaard
februaarip 02-at 2011 05:53

Atassutip siulittaasua Gerhardt Petersen tusagassiutinut taama nalunaaruteqarpoq.

- Ukiut kingulliit pingasut ATASSUT-miit malinnaaffigaarput, Inatsisartutigullu peqataaffigalugu USA-p tungaanniit CIA-p tigusanik nunatta silaannartaatigut angallassisarsimaneragaaneranik suliaq, kingornalu misissuinerit tassunga tunngasut, Gerhardt Petersen oqarpoq.

- ATASSUT-miit piumasarissavarput paasissutissanik allanik nutaanik saqqummertoqarsimappat arlaanaanulluunniit attuumassuteqanngitsumik misissuisoqarnissaa, Atassut allappoq.

- ATASSUT-miit suleqatigisavut tassalu qallunaat nunaani naalakkersuisooqatigiit siuttorisaat Venstre-t, taakkulu suleqatigisaat Konservativ Folkeparti kaammattussavarput suliassaq kikkunnulluunniit attaveqanngitsumit misissoqqissaarneqarnissaa, misissuisoqarnissaa Nunatta Danmarkillu aammalumi USA-p akornanni ataqqeqatigiinnerup innarlinnginnissaa anguniarlugu, Gerhardt Petersen taama allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq