Atassummi siulittaasussatut sassartut tallimaapput
Siulittaasumut qinigassanngortittut tallimaasut Atassut sinnerlugu tatigisatut atuuffeqartareerput Inatsisartunullu qinigassanngortittareerlutik.
Inatsisartunut ilaasortaasimasoq Godmand Rasmussen Sisimiuneersoq, Naalakkersuisunut ilaasortaasimasumut Finn Karlsenimut, maannalu parti sinnerlugu Inatsisartunut ilaasortamut, juunip aappaani Inatsisartunut qinersinermi partiip kinguariarujussuarnerata kingornagut siulittaasutut tunuartumut paarlattaarusuppoq.
Siulittaasumut qinigassanngortittut allat tassaapput, partip inatsisartunut ilaasortaatitaasa pingajuat Knud Kristiansen Upernavimmeersoq, qinigassanngorteqatigalugit Jens Peter Mølgaard Qeqertarsuarmeersoq, Gerhardt Petersen Maniitsumeersoq aamma Steen Lynge Nuummeersoq.
Atassummi siulittaasuugallartup KANUKOKA-milu siulittaasuusimasup Søren Alaufesenip Sisimiuneersup oqaatigaa, Sisimiuni Knud Rasmussenip Højskoliani aggustip 29-anni 30-annilu immikkut ittumik ataatsimeersuarnissami, oqaluuserisassatut siunnersuutit 30-t missaat oqaluuserineqassasut.
