Atassummi siulittaasup tullia Partii Naleqqamut nuuttoq
Aqqaluk Heilmann Atassummi qaammatini marlunni siulittaasup tulliatut atuuppoq. Nunattali namminiilivinnissaanik sulissuteqarusulluni partiimut allamut nuuppoq.
Nunatta namminiilivinnissaa sulissutigerusunnerua, taamaattumik Atassummiiginnarsinnaajunnaarpunga, Aqqaluk Heilmann oqarpoq.
Allattoq Jens Betak
januaarip 09-at 2020 13:52
Aqqaluk Heilmann Atassummi qaammatini marlunni siulittaasup tulliatut atuutereerluni partiimit tunuarpoq Partii Naleqqamullu nuulluni.
Sermitsiaq.ag taama allaaserisaqarpoq.
Atassutip namminiilivinnissamut apeqqummut allamut sammiveqalernera pissutigalugu partiimut allamut nuulluni Aqqaluk Heilmannip Sermitsiamut oqaatigaa.
Siverth K. Heilmann Atassummi ukiuni marlunni affarmilu siulittaasooreerluni novembarimi tunuarpoq.
Aqqalu Jeremiassen kisiartaalluni siulittaasunngornissamut sassarpoq. Siulittaasunngoqqammitsiarlunilu Atassut namminiilivinnissamik kissaateqarunnaarluni Naalagaaffeqatigiinnermut tapersersuiniartoq nalunaarutigaa.
