Atassummi siulersuisut taarserlik
Atassummi tunulequtaqartut ilaata Atassutip nuna tamakkerlugu siulittaasua sakkortuumik uparuarpaa, taassuma Gerhardt Petersenip Atasssummi siulersuisunik nutaanik qinersisitsinissaa piaartumik siunnersuutigaa, taama pisoqarpoq ippassaq Atassummi siulittaasup tulliata Steen Lyngep siulittaasup tulliatut tunuarnerata kingorna.
Erling Madsenip Ittoqqortoormiini Atassutip peqatigiiffiani siulittaasup nuna tamakkerlugu Atassutip siulittaasua Gerhardt Petersen immikkut ittumik ataatsimeersuartitsinissaanik kajumissaarpaa.
- Ataatsimeersuartoqareermat 2008-mi ukioq ataaseq qaangiutiinnartoq siulersuisunut ilaasortat partiinut allanut noorarput, aamma siorna nuna tamakkerlugu ataatsimeersuartitsereermata siulersuisut avissaartuullutik aallarteqqereerput, ukiut kingulliit marluk ingerlanerinnaani ilaasortarpassuit arlariit tunuartersimapput, allaallumi siulittaasorisimasarput aamma tunuarluni, taamaammat partii Atassut annaanniassagutsigu siulittaasorput kajumissaarpara piaartumik immikkut ittumik ataatsimeersuartitseqqullugu, Erling Madsen oqarpoq.
Aamma Uummannami Atassutip peqatigiiffiani siulittaasoq Karl Markussen Atassutip nuna tamakkerlugu siulersuisuisa ammanerusumik suleriaaseqalernissaat partiip ingerlaqqinnissaanut aqqutissatuaasoraa.
- Atassutip siulersuisuisa ammasumik suleqatigiinnissartik amigaatigaat, taanna qaangerneqassappat torersumik inissittariaqarput, suleqatigiinneq aaqqinneqanngippat sinerissami immikkoortortaqarfinnut aamma sunniuttarmat, taama Karl Markussen oqarpoq.
Inatsisartunut qinersisoqarnerani KNR-imi naliliisittagarput Jakob Janussen aamma oqarpoq, Atassutip siulersuisuisa anguniakkatik ersarissartariaqaraat.
- Partiimi aqutsisut eqqissillutik oqaloqatigiittariaqarput, soorlu ajornartorsiortoqarnersoq nalilersuilluariarlutik partiimi anguniagassaminnik siunniussillutik, Jakob Janussen oqarpoq.
