Atassummi aaqqiiagiinnginneq suli ingerlavoq
Ukiuni kingullerni partiimi sunniuteqarsimasut ilaat Kommuneqarfik Sermersuumi kommunalbestyrelsimut Atassutip ilaasortaatitaa Emilie Olsen ima oqarpoq:
- Siulersuisuunerit nutaat aallartiinnarlutik avissaartuutut, siulittaasunngortup iluarsiniassagunigit ukiunilu ukunani atasussaallutik, avissaartuutereeramik siulittaasoq nukissanik amigartuussaaq.
Atassutip siulittaasua Gerhardt Petersen oqaaseqaammut akilluni ima oqarpoq:
- Maannakkorpiaq Emilie Olsen-ip naliliinera assut tupaallaatigaara, tassa maannakkut siulersuisuuninngortut siumut isiginiarlutik politikkimi suliniuteqarniarput. Taavalu siornatigut pisimasut inuttarsiuinerillu qimallugit politikkimik sammisaqarnissaq siulersuisuuninngortut aallunniarpaat, Gerhardt Petersen oqarpoq.
Partiimi isumaqatigiinngissutit naalakkersuinermik aallaaveqaratik inuit akornini periutsinik tunngaveqartut, Emilie Olsenip oqaatigaa.
- Paasivakka siulersuisuunerit avissaartuutut iluminni, pissutigalugu Jensine Berthelsen partiimi allattaanertut siulersuisuunernilu ilaasortatut tunuareersoq ikkutiteqqikkamikku. Tamanna pissusissamissuunngilaq aammalu Atassutip iluani ajornartorsiut inummiit inummut kimmaannersuaq qaangerneqanngippat, siulittaasunngortup siulittaasutut ataatsimoortitsisinnaanera takusinnaanngilaq, Emilie Olsen oqarpoq.
Gerhardt Petersen-illi Jensine Berthelsenimut atorfinitsitsineq ima nassuiarpaa:
- Inatsisartunut ilaasortaatitatta pitsaasumik sullinneqarnissartik kissaatigisimavaat, uangalu tamanna nammineerlunga paasiniareersimavara. Taakkualu Jensine Berthelsen-imit sullinneqarnertik ajorisimanngimmassuk, taamaattumik uanga tunginniit akuersaarsimavara Inatsisartunut ilaasortaatitatta toqqaasimanerat.
