Ataqqinartunnguaq takutinneqartussanngorpoq

"Naak-uku inuit?, Ataqqinartunnguaq aperivoq. - "Maani inoqajuitsumi kiserliornalaarpoq". "Inuit akornaniikkaluarluni aamma kiserliornartarpoq, pulateriaarsuk akivoq. Oqaatsit oqaluttualiamit - Ataqqinartunnguamit - pinngortuuupput. Antoine Saint-Exupéryp 1943-mi taanna oqaluttualiaraa. Nunatta Isiginnaartitsisarfiata isiginnaagassiaq taanna isiginnaartitsissutiginialerpaa.

Allattoq Carla Davidsen

oktobarip 25-at 2011 08:05

Makka Kleist ilitsersuisuullunilu franskisuumit kalaallisuumut nutserisuuvoq:

- Exypérip oqaluttualiaa, "Le Petit Prince", nutsernialerakku taaguutissaa sivisuumik eqqarsaatigaara. Ataqqinartunnguaq inuuvoq usornaannartumik innarligassaangitsoq, kimilluunniit aqunneqarusunngitsoq, taakkulu tassa pissutigalugit taaguuserpara "Ataqqinartunnguaq".

Oqaluttualiaq kikkunnilluunniit takuneqarsinnaavoq; inersimasuugaanni, inuusuttuugaanni meeraagaanniluunniit. Inuunermi suut itisuut pingaarutillit attorpai; inuuneq/toqu; namminissarsiorneq/inuppalaarnerlu.

Isiginnaartitsissapput Else Danielsen, Mike Fencher Thomsen, Majbritt Bech, Gerda Boassen aamma Rassi Thygesen. Dida's Dansebureaumit qitittartut arfineq-pingasut aamma peqataassapput.

Atuagaq "Le Petit Prince" oqaatsit 180-it sinnerlugit nutsigaavoq, 80 millioninillu amerlanernit tunineqareerluni. Isiginnaartitsissut Katuami novembarip 19-ianni 20-annilu isiginnaartitsissutigineqassaaq.

Ataqqinartunnguaq takutinneqartussanngorpoq

Aamma atuaruk