Ataqqinartorsuup kisermaassilluni naalakkersuisoq nersornaaserpaa
Tamanna nunanut allanut tunngasunut ministerip, Lene Espersen-ip Kamal Qureshi-mut SF-meersumut akissuteqataani Berlingske Tidendemi allaaserineqarnera atuarneqarsinnaavoq.
Dronning Margrethep Bahrain-mi kisermaassilluni naalakkersuisumut Khalifamut nersornaammik naalagaaffiup tunniuttagaasa annersaata tullianik, Storkorset af Dannebrog-imik nersornaaseereersorlu, naalakkersuinermik suliaqartut oqaaseqartartullu ileqimisaartuutigiinnarpaat.
Nersornaaseereernerup kingorna sapaatip akunneri arlalinnguit qaangiuttut, Khalifap peqqusineratigut naalagaaffeeqqami inoqajuitsumiittumi inuinnaat oqartussaaqataanerat pillugu akerlisussutsimik takutitsisut eqqaaneqarlutillu tigusariortorneqarput.
Maanna nassuerutiginninneq nunanut allanut tunngasunut ministerimit, Lene Espersenimeersoq SF-mi inuit pisinnaatitaaffii pillugit oqaaseqartartumut, Kamal Qureshimut allakkatigut akissuteqaat aqqutigalugu takkuppoq:
- Kisiannili nersornaasiinermut tunngatillugu danskit nunanut allanut politikkianut atatillugu paatsooruteqarnernik pilersitsisinnaasutut suliaq isigineqarpoq. Taamaattumik Kunngikkormiut Nunanullu allanut tunngasunut ministereqarfiup isumaqatigiissutigisimavaat, siunissami pisortatigoortumik tikeraartoqarnernut atatillugu nersornaasiisarnerit pillugit apeqqutit isumaliutigeqqissaartarnissaat, immikkut maluginiarlugu pisuni taamaattuni qulartoqartannginnissaa qulakkeerniarlugu, ilaatigut akissuteqaammi taama allaqqasoqarpoq.
Akissuteqaat SF-meersumit Kamal Qureshimit iluarisimaarneqarpoq.
Naalakkersuisut illuatungaani kisermaassillutik naalakkersuisuusunut appisaluussiniannguarlutik illuatungaanilu naalagaaffiup nersornaasiuttagaannik akimanerpaajusunik Dronningi inunnut taakkunanngarpiaq tunniussuitinniarlugu kukkussutaasarsimasunut naalakkersuisut akisussaatinneqarnissaannik taanna siornatigut ujartuisimavoq, siunissami sulianik taamaangajattunik naammattuueqqinnginnissaq siunertaralugu.
