Ataqatigiissaarineq naalakkersuisoqatigiinni iluatsinngitsoortoq
Inatsisartut Ataatsimiittarfianni isiginnaarussuarmi toornerit qorsuit sisamat Demokraatit angernerannik takutitsipput. Toornerilli aappaluttut amerlaneroqalutik takutippaat, naaggaartut amerlaneroqisut, Inuit Ataqatigiinneersut taakkununnga ilaallutik.
- Naalakkersuisoqativut pakatsiffigaakka. Siunnersuutiga ataqatigiissarinermut ataatsimititaliatsinni saqqummiunneqarnikuuvoq, tassanilu oqaluuserneqarmat, Naalakkersuisoqatigiinnit akuerineqassasoq neriorsuutigineqarpoq, Justus Hansen oqarpoq.
Taamaakkaluartoq toqqavimmik illuliorfissanik qinnuteqartunut piumasaqaatit sukaternerisigut, illuliorfissanik iluanaaruteqarniarnermik pakkersimaarinnerulernissamik imaqartumik Justus Hansenip siunersuutaa tapersersorneqanngilaq.
Naalakkersuisoqatigiit suleqatigiilluarnissaat qulakkeerniarlugu, ataqatigiissaarinermut ataatsimiititaliorsimagaluarput, IA-llumi tassani ilaasortaatitaata ataatsip, Justus Hansen suleqatiminut pakatsinera paasilluarsinnaavaa:
- Ilaatigut paasisinnaavara. Ilumoorpoq, siunnersuutaa tapersersorneqarmat, aammami suli taamaappoq, Naaja Nathanielsen oqarpoq.
Kisianni taassuma oqarneratut, partiip isumaa allanngorpoq, Naalakkersuisut naliliimmata, inatsit maanna atuuttoq, iluanaarniarnissamut naammattumik pakkersimaarinnittoq.
Justus Hansenip tamanna eqqunngitsuusoraa. Kisianni taanna ataqatigiissaarinermut ataatsimiititaliami ilaasortaammat, Naaja Nathanielsen isumaqarpoq, naalakkersuisuni suleqatit nammineq nassuiaassimasariaqaraluarai, IA-llu naaggaarnialernera nammineerluni takusinnaasimasariaqaraluarlugu.
Justus Hansenip siunnersuunni siullermeerlugu saqqummiukkamiuk aatsaat ikinnerussuteqartussaaanertik paasisimagamiuk suli pakatsisimaarpoq.
Aammali susoqassanersoq nammineerluni paasiniarsimasinnaagaluarlugu nassuerutigaa.
- Soorunami taamaassinnaavoq. Qanorli ikkaluarpalluunnit naalakkersuisuutitaqarnikkut suleqatigiikkatta uannut saaffiginnissimassagaluarput. Kisianni soorunami aamma paasiniaanerusimasinnaagaluarlunga takusinnaavara, siunissamilumi aamma taamaattassaanga, Justus Hansen oqarpoq.
Naaja Nathanielsenip nassuerutigaa, naalakkersuisoqatigiit ataaqatigiissaarinerat pitsaanerusinnaasoq. Kisianni Justus Hansenitullu isumaqarpoq, una pisoq Naalakkersuisoqatigiit avissaartuunnerannut ersiutaanngitsoq.
-Aamma ersiutaasinnaavoq, apeqqutini assigiinngitsuni isumaqatigiinngissutitta saqqummertarnerunissaannut ammaassisimasugut. Uangalumi aamma taamaassoraara, Naaja Nathanielsen oqarpoq.