Ataatsimoortumik tapiissutit annikilliartuaartikkusuppai
Savalimmiuni aningaasarsiornerup annertusiartuinnarnera malillugu ataatsimoortumik tapiissutit annikilliartuaartinneqarnissaat, Savalimmiuni naalakkersuisut siulittaasuata Jóannes Eidesgaardip piumasaraa.
- Imminut napatinnissarput anguniarlugu aningaasarsiornissarput partiit tamarmik piumasaraat. Taamaammat ataatsimoortumik tapiissutit Danmarkimit pisartakkavut annikilliartuaartinneqartariaqarput. Tapiissutit annikilliartuaartinneqarnissaat pilersaarusiorluarnikkut angusinnaavarput, Jóannes Eidesgaard aviisimut Sosialurinimut oqarpoq.
Ataatsimoortumik tapiissutit ukiumut 615 millioni koruuniupput, pisartakkallu 2015-imi atorunnaarsinneqarnissaat Socialdemokratit siulittaasuata takorloorpaa.
Tapiissutilli annikilliartuaartinneqarnissaat naalakkersuisooqatigiinni ilaasunit Sambandspartimit akerlilerneqarpoq.
- Tapiissutit annikilliartuaartinneqarnissaannik isuma ajunngikkaluarpoq, aningaasarsiornerulli annertusiartuaarnera malillugu annikkilliartuaartitsiniarneq pissusissamisuunngilaq, Sambandspartiip siulittaasua Kaj Leo Johannesen oqarpoq, nangillunilu:
- Savalimmiunimi aningaasarsiorniarneq annertusiartuaarani annikilliartulissagaluarpat qanoq iliortoqassagaluarpa? Kaj Leo Johannesen naggasiilluni aperivoq.
