Ataatsimoorlutik naalakkersuilissapput
Nunat tamalaat nutaarsiassaqartitsivii naapertorlugit, isumaqatigiissut Afrikami Kujallermi naalagaaffiup præsidentia Thabo Mbeki ikiorsiullugu iluatsinneqarsimavoq. Illuatungiliuttut peqataatillugit naalakkersuisunik pilersitsinissaq isumaqatigiissutip imaraa.
Zimbabwemi marsimi qinersineqarmat tamatumalu kingornagut qinerseqqittoqarnerani naalakkersuinermut tunngatillugu sakkortuumik ajornartorsiortoqalerpoq nunalu tamakkerluni eqqissiviilliorfiulerluni.
Ukiut qulit ingerlaneranni Mugabe aamma Tsvangirai ullumikkut siullermeerlutik naapillutik illoqarfiit pingaarnersaanni Hararemi hotelimi atsioqatigiipput.
Zimbabwe naalakkersuinerinnakkut ajornartorsiornani, aammali aningaasarsiornikkut ajornartorsioqaaq. Aningaasap nalikilliartupiloornera ajornartorsiutaavoq, tassami Zimbabwep dollarii 100 milliardit atorlugit aningaasanik naqiterisoqaqqittariaqarsimagami.
Nunami tamaani aamma kaattoqarneranut pissutaavoq, Mugabep naalakkersuisuisa nunaateqarnermik aaqqissuusseqqinnerat akerleriissutaaqisoq. Qaqortumik amillit nunaataat arsaarinnissutigineqarmatali nunaateqarnermit tunisassiat akii appariartuinnavissimapput.
