Ataatsimiittussat akerliussutsimik takutitsiffiginiarpaat

Akerliussutsimik takutitsiniartut isumaqarput, ataatsimeeqataaniartut tassaasut inuussutissarsiutinik ingerlataqartut nunarsuarmi tamarmeersut, taamalu tassaallutik "silap pissusaanut innarliiniaqatigiit", silap pissusaata allanngoriartorneranut pisuusut.

Inuussutissarsiornermik ingerlataqartut siuttuisa nunarsuarmi tamarmeersut, suliffissuit silap pissusaa pillugu ajornartorsiornermut qanoq iliuuseqaqataasinnaanerat oqaluuserissavaat. Tamatumani decembarimi Københavnimi silap pissusaa pillugu ataatsimeersuarnissamut atatillugu, nunarsuarmi naalakkersuinermik ingerlatalinnut qulliunerusunut iliuusissanik tikkuussinissaq siunertarineqarluni.

Ataatsimiinnerup ammarneqarnerani ilatigut peqataassapput dronning Margrethe, silap pissusaanut nukissuuteqarnermullu ministeri Connie Hedegaard (K), Amerikami siornatigut præsidentimut tulliusimasoq silap pissusaanik ilisimasalik Al Gore aamma Naalagaaffiit Peqatigiit siuttuat Ban Ki-moon.

Akerliussutsimik takutitsiniartut oqaatigaat aqagu akerliussutsimik takutitsinermi ataatsimiinneq akornusersorniarneqartoq, qanorli iliorlutik akornusersorniarnerlugu maannangaaq oqaatigerusunngilaat.