Ataatsimiititaliarsuaq paasisassarsiorluni angalaarpoq
Ataatsimiititaliarsuarmi ilaasortat Nuummiinnerminni naalakkersuisunik ataatsimeeqateqarput, tassani Kangilinnguani sakkutooqarfiup inerisarneqarnissaa, immikkoortunullu aggulunneqannginnissaa ataatsimiititaliarsuarmit kissaatigineqartoq, erseqqissarneqarluni.
Umiarsuarujussuit takornarianik angallassisut sinerissami angalasalernerisigut, siunissamilu aatsitassanik piiaanissaq eqqarsaatigalugu, Kangilinnguani sakkutooqarfiup annaassiniarsinnaanissamut isumannaallisaanissamullu naleqqussarneqarnissaa pisariaqartinneqartoq, nunanut allanut naalakkersuisoq Aleqa Hammond oqarpoq.
Illersornissaq pillugu ataatsimiititaliarsuup nunatsinnut angalanera, aappaagu illersornissaq pillugu isumaqatigiissutissaq sioqqullugu pivoq.