Avannaata Qimussersua: Ataatsimiititaliaq tusaaniarneqanngimmat ajortoqaqqittoq

Ajungaasumik kingullinngortitsineq, qimmeq teriarsuarnut toqoraammik nerilluni toqusoq. Ukioq Avannaata Qimussersuani pisut naliginnaanngitsut paasisagut amerlaninngorput, ajungaasummi Ville Siegstadip qimmii nammineq nerukkaatiginngisaminik puisip orsuanik nerisinneqarsimapput.

Qimussersuarmi ajugaasup Ville Siegstadip Avannaata Qimussersuani unammersuarnissamut sapaatit akunnerinnanngortoq qimmii maannamut kinaassusersineqanngitsumik ajortumeeriniarluni puisip orsutortinneqarsimapput, taamaalilluni sungiusaalluni qimusserarnermini aramasoorsimavoq.

Taassuma taama pineqarnini Kalaallit Nunaanni Qimussertartut Kattuaffiata ataani naammagittaalliuutinik suliaqartarfimmut naammagittaalliuutigaa, pisorlu ima oqaluttuaraa.
- Qimmima akornani orsukunik sinneqarami, taamaattumik nererusunngilaalluunniit sinnitik qattullugit nerisimagamik, Ville Siegstad oqarpoq.

Naammagittaalliuutinik suliaqartarfimmi siulittaasup Mikkel Jeremiassenip Qimussertussat kattuffimmillu suliaqartut ataatsiminneranni qimmit unnuaanerani pigaartunit nakkutigineqartarnissaat inassutigisimagaluarpaa.
- Kisianni tassa taama ersaritsigingaluarpoq timitaliiffigineqanngilaq taanna assorujussuaq ajuusaarnarpoq, KNQK-mi ukiuni 17-ini siulittaasuusimasoq, ataatsimiititaliamilu naammagittaalliuutinut suliaqartarfimmi siulittaasoq Mikkel Jeremiassen oqarpoq.

Taanna naapertorlugu qimussersuarnerup aaqqissuunneqarnerani isorisaqarsimagunik aaqqissuutissanik uparuaasinnaanissaq ataatsimiitialiap suliassaanut ilaavoq.

Unnuami ikinnerpaamik marlunnik nakkutilliisoqartassasoq ataatsimiititaliap siunnersuutigaa.
- Uagut tassa piumasarivarput unnuaanerani minnerpaamik nakkutigineqassasut, Mikkel Jeremiassen oqarpoq.

KNQK-ip siulittaasua pisoq pillugu oqaaseqartinniarlugu attaveqarfiginiaraluaratsigu iluatsitsinngilagut.

Aningaasanut inatsimmi qimussersuarnissamut qimmit, qamutit sukkaniuukkiallu angallannerinut 250.000 koruuninik tapiisoqarpoq.