Ataatsimiititaliaq suligasuartussaq pilersinneqarpoq

Kommuneqarfinnik kattussuutsitsinissaq Inatsisartuni ullumi oqaluuserineqangaatsiarpoq.

Qanoq isilluni kattussuutsitsinissaq pillugu Naalakkersuisooqatigiit partiit pingasut isumaat assigiinngissuteqartut malunnarsimavoq, Siumut Inuit Ataqatigiillu allatut isumaqartut, pingajuat Atassut allatut isumaqarluni saqqummiussimmat.

Tamanna pillugu Inatsisartut ulloqeqqata kingorna ataatsimiinnerat nangitsiaannartoq, minutsini 15-ini unitsinneqarallarpoq, kommuneqarfinnik kattussuutsitsinissamut tunngasunik suligasuartussamik ataatsimiititaliamik Inatsisartut pilersitsinissaannik Atassutip siunnersuutaa Inatsisartuni partiinit isummerfigineqartussanngormat.

Ataatsimiinneq unillatsiartillugu isummersortoqareersorlu Atassutip siunnersuutaa partiinit tamanit isumaqatigineqarmat, ataatsimiititaliaq suligasuartussaq pilersinneqarpoq.

Ataatsimiititaliamik suligasuartussamik pilersitsinikkut taamaasilluni naalakkersuisooqatigiinni isumaqatigiinnginnerit, ajornartorsiortitsilersinnaagaluit pinngitsoortinneqartut Inuit Ataqatigiit naliliipput.

Ataatsimiititaliaq suligasuartussaq kommuneqarfinnik kattussuutsitsinissamut tunngasunik apeqqutinik nangaassutaasunillu qulaajaanermik suliaqassaaq.

Siunnersuutip Inatsisartuni partiinit tamanit taperserneqarnera Atassummit nuannaarutigineqarpoq, Ataatsimiititaliamillu pilersitsigasuartariaqarneq naalakkersuisooqatigiit ajornartorsiuleraluarnerattut paasineqassanngitsoq Atassummit erseqqissaatigineqarpoq.

Naalakkersuisut siulittaasuat Hans Enoksen isumaqarpoq Ataatsimiititalimik taama pilersitsineq ajunngitsumik suleqatigiinnissamik tunngaveqartoq.

- Taamaalilluni Inatsisartuni ilaasortat paasiumasaat sukumiisumik qulaajarneqassapput.

Ataatsimiititaliamik suligasuartuissamik pilersitsinikkut naalakkersuisooqatigiit ajornartorsiulernissaraluat taamaalilluni pinngitsoortinneqarnersoq aperigatsinni akivoq:

- Naamik isumaqarpunga taamaattoqanngitsoq, kisinni aaqqitassat ataasiakkaannguit erseqqissaassutigineqarput. Tassa Inuit Ataqatigiit Siumullu nalorninaalluinnaqqissaartumik oqarput kattussuttoqassaaq kommunillu sisamanngortinneqassapput.

Atassutikkut isumaqataagaluarlutik pinngitsaaliinngissamik oqalunnerat Hans Enoksenip eqqumiigaa.

- Aallaqqaataaniilli oqalupput kattussuuttoqassaaq, kisianni illuatungaatigut pinngitsaaliinnginnissamik oqalunnerat paasiuminaappoq ilungersunarlunilu, tassami naalakkersuisooqatigiinnermi isumaqatigiissut malillugu kommunit kattussuunnissaat Atassutikkullu aamma atsioqatigiissutiginikuuarput.