Ataatsimiititaliaq piniagassanik sammisalik pilerseqquaat
Aalisakkanik piniagassanillu pisassiinermik sammisaqartartussanik ataatsimiititaliamik pilersitsisoqarnissaa pisariaqartoq Demokraatit isumaqarput.
Naalakkersuisut nunatta avannaani piniartunut qilalukkanik qernertanik 100-nik sapaatip akunnerata siuliani pisasseeqqipput, naak Pinngortitaleriffimmi biologit allatut innersuussuteqaraluartut.
Biologit, piniartut, peqatigiiffiillu assigiinngitsut ataatsimiititaliami ilaasortaanissaat siunnersuutigineqarpoq.
Suliassami peqataasut tamarmik tusarniarneqartarnissaat taamaaliornikkut anguneqarsinnaassaaq, Demokraatit sinnerlugit inatsisartuni ilaasortap Jens B. Frederiksenip oqaatigaa.
Taanna inatsisartut aalisarnermut, piniarnermut nunalerinermullu ataatsimiititaliaannut ilaasortaavoq, imatullu tunngavilersuivoq:
- Siunnersuutiginikuuarput ataatsimiititaliamik pilersitsisoqassasoq; piniartunik KNAPK-miit APK-miillu kiisalu Pinngortitaleriffimmiit ilaasortaqartumik, taakkulu ataatsimoorlutik Naalakkersuisunut innersuussuteqarsinnaasassapput. Isumagalu naapertorlugu taamaaliornikkut assortuuttaqattaarunnaarlutik imminnut qanillisinnaassagaluarput taamaalillutillu imminnut paaseqatigiissimallutik siunnersuusiortassagaluarlutik, Demokraatit sinnerlugit inatsisartuni ilaasortaq Jens B. Frederiksen taama oqarpoq.
Naalakkersuisut nunatta avannaani piniartunut qilalukkanik qernertanik pisasseeqqinnermikkut, pisassat 285-iusimariarlutik 385-inngorput.
