Ataatsimiititaliaq nassuiaateqarfigineqarnissaminik kissaateqarpoq

Inatsisartut Aalisarnermut Piniarnermullu ataatsimiititaliaat, illoqarfinni Ilulissaniit Nanortalik ilanngullugu puisit amiinik matusinermut tunngasumik nalunaarfigineqarsimanngilaq.

Ataatsimiititaliami ilaasortaq Hans Enoksen kaammattuivoq matusineq eqqarsaatigeqqinneqartariaqartoq.

- Inatsisartut piniarnermut ataatsimiititaliaat pissutsinik qanimut ilisimatinneqarsimanngilaq, allakkatigulluunniit naamik, tamannalu uggornarpoq, Hans Enoksen oqarpoq.

Illoqarfinni Ilulissaniit Nanortalik ilanngullugu, puisit amiisa tunisaaneri februaarip 15-anni unitsinneqarpoq.

Puisit amiisa tunisaajunnaarnerat ataatsimiititaliami ilaasortat tusagassiorfiit aqqutigalugit tusarpaat.

- Ulloq taanna sioqqullugu ilisimatinneqanngilagut, sunaaffa matusisoqarnissaanik pilersaaruteqartoqartoq, tamannalu Inatsisartunut ilaasortanut aamma Aalisarnermut Piniarmut Nunalerinermullu Ataatsimiititaliamut pakasaavoq, Hans Enoksen oqarpoq.

Aalisarnermut Piniarnermut Nunalerinermullu ataatsimiititaliap piumasaraa,

Piniarnermut Naalakkersuisup illoqarfinni Ilulissaniit Nanortalik ilanngullugu amminik tunisinerup unitsinneqarneranut suut tunngaviusimanersut pillugit ataatsimiititaliamut nassuiaateqassasoq.

Aalisarnermut, Piniarnermut Nunalerinermullu qullersaqarfiup KNR-imut oqaatigaa, ataatsimiititaliap allagaqaataa aatsaat ippassaq tigugamikku maanna oqaaseqarfigisinnaanagu.