Ataatsimiititaliaq: Naammaleqaaq
Nalunartorli tassaavoq, aningaasarpassuit taakku - tamatta akileraartarnitsigut pigisavut - nunatsinni inissaaleqinerujussuarmut iluaqutaavinnersut.
Akileraartarnermut Atugarissaarnermullu Ataatsimiititaliap inassutaani, tusagassiorfinnit maluginiarneqarluartumik ippassaq saqqummiunneqartumi taama ilaatigut erseqqissuliortoqarpoq.
Aningaasarpassuit inunnut pisariaqartitsinngitsunut ataatsimiititaliap tuttarsorai.
- Aningaasaliissutaasartut ilumut pisariaqartitsivissunut tuttarnersut qulakkeerneqarsimanngilaq, allapput.
400 millioni koruunit marlunnut avissimapput. 110 millioni koruunit boligsikringimut, sinneri 300 millioningajaat aningaasanik erniakitsunik attartortitsinermut akileraarutikitsumilluunniit initaarniarnermut illutaarniarnermulluunniit tapiissutaasarlutik.
Ataatsimiititaliap isumaa malillugu taama ingerlaannartoqarsinnaanngilaq.
- Namminersorlutik Oqartussat akileraarutitaqanngitsumik initaarniartunut sooq atukkiiuaannassappat, uffa akileraartartut allat tamarmik taama pineqanngitsut? Erniakitsumik atukkinneqarneq toqqaannartumik tapiinertut isigisariaqartoq, ataatsimiititaliaq isumaqarpoq, imalu tunngavilersuilluni:
- Politikki erseqqissartariaqarpoq, taamaalilluni aamma tapiissutaasartut akileraarnikkullu inuit ilaannaanut iluaqusiisarneq atortunnaarsikkiartuaartillugu, allapput.
