Ataatsimiititaliaq: Illuuteqarneq akisunerulissaaq

Illumik pisinermut atatillugu aningaasat attartukkat erniaasa ilanngaaserneqartarnerat ukiut qulit ingerlaneranni atorunnaarsikkiartuaarneqassaaq. Aamma illortik tunissagunikku, iluanaarutiminnit akileraartalissapput. Taamaakkaluartoq illuutillit aningaasat qaammamut sinnerisartagaat ikilerujussuassanngillat. illuutilippassuimmi sulinikkut isertitaminnit akileraarutaat appartussaapput.

Assersuutigeriartigit Ilulissani ilaqutariit aalisartukkormiut, 75 kvm-erisut angitigisumik illuutillit. Uiusoq kilisaammi inuttavoq, nulia angerlarsimaannartuulluni. Marlunnik meeraqarput, ukiumullu 600.000 kr-nik isertitaqarlutik.

Illumik pisinermut Namminersorlutik Oqartussanit aningaasanik atorput, ukiuni 20-ni siullerni akileraarusersugaanngitsunik naafferarlugillu akilersugaangitsunik, taakkualu saniatigut aningaaserivimmit atorlutik.

Aningaasat atorneqarnerinut erniat ilanngaaserneqartarunnaassapput. Tassalu ilaqutariit illumut akilersuinerulissagamik, aningaasanik annaasaqassapput.
Kisianni akileraartarneq allangortinneqassappat, anigaasarsiaminnit akileraarutaat appassapput. Tassami ernianik allanguineq ukiut aqqanillit qangiuppata malunniutilerpat, ilaqutariit assersuutigisagut taakkua qaammammut 874 koruuninik anigaasaateqarnrulissapput.

Taava aamma allamik assersuuteqalaarta.
Tassalu anaanaq ilinniaqartoq kisimiittoq Namminersorlutik Oqartussani qaffasissumik atorfilik. Taanna inissiami 50 kvadratmerisut angitigisumi nammineq pigisamini ineqarpoq, attartornissamut periarfissat ullumikkutut ittut atorlugit pisiarisaminik. Arnap taassuma ernianut ilanngaat annaassagamiuk, aningaasat qaammammut atorsinnaasai 108 kr-ninik ikileriassapput.

Ataatsimiititaliap siunnersuutaanni inissiat akiisa ersarinnerulernissaat siunertaavoq.
Tassami ataatsimiitkitaliaq naapertorlugu, inissigisatta nalinga tamaatr akilerneq ajorparput. Taamaammat Tapiissutit saqquminngiusartut atorunnaarsinniarneqarput. Ilaqutariit marluk uani assersuutigisagut inigisaminnik pisereersimammata, allannguutit ukiut aqqanillit ingerlaneranni sunniukkiaruaassapput.

Siunissami illusiumaartussanut tapiissutit saqquminngiusartut atorunnaariartuasassapput. Tassalu taakkua angajooqqamissulli pitsaatigisunik atorniarsinnaajunnaassapput. Sulinermilli iseritat akileraarutaat appassammata, aningaasat allanut atorsinnaasaat amerlissapput.
Tassalu inissianik pisinermi akit naggaterpiaatigut appassapput. Tamanna pisiumaartussanut pitsaaqutaassaaq, tunisiumaartulli iluanaarutissaat ikilissapput. Kisianni tassa tamannarpiaavoq atatsimiititaliap angorusutaa.