Ataatsimiititaliaq Bruxelles-iliarpoq

Inatsisartut aningaasaqarnermut ataatsimiititaliaani ilaasortat sapaatip akunnerata tulliani Bruxelles-iliassapput. EU-mi puisit pillugit oqallinnermi, ataatsimiititaliaq tapersersortissarsioriartussaaq. Soormitaava taamak ungasitsigisumut angalasariaqariarpa tusaaneqarumalluni ? Aningaasaqarnermut ataatsimiititaliap siulittaasuata Ellen Christoffersen-ip EU-imik attaveqaqatigiinerup pingaaruteqassusia erseqqissarpaa.

Inatsisartuni ilaasortat atorfilittallu Bruxelles-imi suleqatiminnik naapitsinissaat pingaarnerpaajuvoq, taamaaliornikkummi attaveqaqatigiinneq attanneqaannassaaq. Suleqattissarsiornissaq pisariaqartorujussuuvoq soorlu puisit pillugit kalaallit soqutigisaat sorsuutigissallugit. Belgiamiut puisit amiisa tassanngaannaq eqquteqqusaajunnaartitsinialermata, misillerfigererparput, tamakkulu aallaavigalugit, naalakkersuinermik suliaqartuusugut, pineqartoq pillugu sorsuutiginninnissarput pisariaqarpoq, kalaallillu puisinniariaasiat Canadamiunit allaanerunera oqaluttuarissallugu, Ellen Christoffersen radioaviisiut oqarpoq.

Aviisip sermitsiap allaaserisaani, Nunatsinni Takornariaqarnermut Inuussuttissarsiornermullu siunnersuisoqatigiit, naalakkersuinermik suliaqartut Bruxelles-iliarnerat, isornartorsiorpaat, asuli pinerunerarlugit, sinnersuisoqatigiimmigooq naalakkersuinermik suliaqartut ikiorsinnaagamigit, pineqartut pillugit EU-mi paasissutissanik tunniussinermikkut. Siunnersuisoqatigiit isornartorsiunerat pillugu Ellen Christoffersen oqarpoq takornariaqarnermut inuussutissarsiornermillu siunnersuisoqatigiit, takornariaqarneq samminerussariaqaraat, naalakkersuinermillu suliaqartut EU-mi inatsisartunik ilaasortanik attaveqaqatigiinerunissaq suliarissammassuk. Suleriaaseq pinnagu, suliariaatsimili inuit oqaloqatigalugit.

Inatsisartut aningaasaqarnermut ataatsimiititaliaani ilaasortat Bruxelles-liarlutik ullumi aallarput, marsillu ulluisa arfineq pingajuanni nunatsinnut utissallutik.