Ataatsimiititaliaq aggersarneqassaaq

Thomas Kristensen, Inatsisartut nunanut allanut sillimanissamullu ataatsimiititaliaani siulittaasuuvutit, pisunut qanoq isumaqarpit? Apeqqummullu akivoq:

-Tassa uanga formanditut misigisimavunga, tupallungajaasiit taamatut pisoqarsimasoq Kalaallit Nunaanni, taamaammat formanditut ataatsimiititaliami piaarnerpaamik ataatsimiinnissarput sulissutiginiarpara, tassani oqallisigissavarput.

Inatsisartut nunanut allanut sillimanissamullu ataatsimiititaliaani siulittaasoq taamak oqarpoq, illua’tungiliuttuni Demokraatit sinnerlugit inatsisartuni ilaasortaasoq Jens B. Frederiksen partiimi isumaat imak saqqummersippaa:

-Tassa uagut oqaatigisinnaavarput Demokraatit minnerpaamilluunniit akuerisinnaanngikkaat inuit pisinnaatitaaffii nunai tamalaani malittarisassat unioqqutinneqarnissaat, taanna akuerisinnaanngilarput. Taassuma saniatigut aamma kissaatigivarput qallunaat naalakkersuisuisa misissussagaat una pisimasoq.

Illua’tungiliuttut partiiata aappaata siulittaasua Folketingimilu ilaasortaasimasoq Kuupik Kleist oqarpoq:

-Soorunami akuerineqarsinnaanngilluinnarpoq ilumuussappat Folketingimi ilaasortaanerma nalaani Folketingi salluliuunneqartarsimasoq, tamanna ministeriusunut annertoorujussuarmik kinguneqartinneqarsinnaavoq, ilumuussappat, taamaattumik una imaannaanngitsuuvoq pineqartoq, aammalu misissuieqqissaartoqartariaqarpoq pisimasunik.