Ataatsimiititaliap akissutisiani naammaginngilai

Air Icelandimut isumaqatigiissummut tunngatillugu Naalakkersuisut siulittaasuata, Kuupik Kleistip, Aningaasaqarnermut ataatsimiititaliamut tapersiutaa piinnarlugu suliaq tamaannga killeqarnavianngilaq.Tassami Aningaasaqarnermut ataatsimiititaliap ilaasortaasa tamakkerlutik, suli amigaatigaat isumaqatigiissutip atuutsinneqalernissaanut tunngavilersuutit naammattut. Tamannalu tunngavigalugu ataatsimiititaliaq allakkanik apeqaqutinik suli amerlanernik Naalakkersuisut siulittaasuannut aammalu isumaqatigiissummut suliaqartumut, Palle Christiansenimut allagaqaqqipput.

Naalakkersuisut siulittaasuata, Kuupik Kleistip Aningaasaqarnermut ataatsimiititaliap piumasaa malillugu akissuteqarnermini oqaatigaa, Air Icelandimut isumaqatigiissut atorunnaarsinneqarnavianngitsoq.Taarsiulluguli neriorsuutigalugu suliamut attuumassuteqanngitsumit tamanna misissorneqassasoq. Taama isummersimaguni isuma tamanna nammineq pigiinarsinnaagaa, Aningaasaqarnermut ataatsimiititaliap siulittaasua, Naaja Nathanielsen oqarpoq.

- Aningaasaqarnermut ataatsimiititaliami ilaasortat tamakkerluta suli isumaqartuarsinnarpugut, nunatta aningaasaqarnera eqqarsaatigalugu Air Icelandimut isumaqatigiissut ajorluinnartuusoq atorunnaarsittariaqartorlu, aammalu Naalakkersusiut siulittaasuata siunnersuutaa tassalu, pisumut attuumassuteqanngitsumit misissorneqarnissaa pisariaqarsorinatigu,

Aningaasaqarnermut ataatsimiititaliap siulittaasua, Naaja Nathanielsen oqarpoq, Naalakkersuisullu siulittaasuata pisumut pissusilersornera naammaginagu:

- Pisup qulaajarneqarnerani paasissutissat ima amigaateqartigaat, allaat Naalakkersuisut siulittaasuanut aamma Aningaasaqarnermut Naalakkersuisumut, akissutinik atorsinnaasatsinnik kissaateqarfigalugit siusinnerusukkut apeqqutigeriikkagut kingumut apeqqutigeqqinniarlutigit. Taassuma saniatigut aamma Aningaasaqarnermut Naalakkersuisumut nutaanik apeqqutinik ilanngussissaqarpugut.

Palle Christiansenimut apeqqutit suut ilanngunneqarsimanersut Naaja Nathanielsenip maanngagaaq suli oqaatigerusunngikkallarpai. Isumaqatigiissutilli nunatsinnut sutigut iluaqutissiisinnaanera uppernarsaatinillu takussutissanik Kuupik Kleistimit paasissutissanik piumasaqarlutik:

- Isumaqatigiissuteqarnermi aningaasanik nunatta sipaarnissaa qularigatsigu maanna Naalakkersuisunut saaffiginneqqissaagut paasissutissanik amerlanernik piumasaqarluta. Tassami isumaqatigiissutip akuerinissaanut tunngavilersuutaasut pappiaraatitsinni takusinnaanatigillu amigarilluinnaratsigit.

Naaja Nathanielsen oqarpoq. Allakkat aqagu tunniunneqassasut Naaja Nathanielsenip oqaatigaa naatsorsuutigalugulu ullut qulit qaangiutsinnagit akissummik pereernissartik.