Ataatsimiisitsiniapiloortarput
Danmarkimi kommunini nunasisut akuunerulersinniarlugit siunnersuisoqatigiit ilaasortaasa ataatsimiisinniartarnerat ajornartorsiutaavoq.
Tamanna DR-ip nutaarsiassaqartitsivianit apersuinermi ersersinneqarpoq. Siunnersuisoqatigiinni siulittaasut 62 procentii isumaqarput ataatsimiikkaangamik ilaasortat amerlavallaartut ataatsimiigianngitsoortartut. Tamatumunnga patsisaasinnaavoq siunnersuisoqatigiinni ilaasortat misigisimammata innersuussutitik politikerinit tusaaniarneqarneq ajortut.
Kalaaleq Nikoline Ziemer upernaarli Københavnip kommuniani siunnersuisoqatigiinnut qinigaavoq. Taanna septembarip aallaqqaataaniilli ataatsimeeqataaqqissimanngilaq – tamatumunngali erninerminut atatillugu sulinngiffeqarnera patsisaavoq.
Nikoline Ziemer naapertorlugu Københavnip kommuniani sulerusussuseq ataatsimiinnernilu peqataasarneq siunnersuisoqatigiinni ajornartorsiutaanngillat. Taamaattorli politikerit tusaaniartannginnerinik isornartorsiuineq paasisinnaalluarnerarpaa.
- Nunasisunut borgmesteri ataatsimeeqatiginikuuarput isornartorsiorlugulu nunasisut akuunerulersinniarlugit siunnersuisoqatigiit taamaallaat tusarniaavigineqarsinnaammata akerliliisinnaatitaanatillu. Pisinnaatitaaffeqarnerusariarpugut, Nikoline Ziemer oqarpoq. Nunasisut akuunerulersinniarlugit siunnersuisoqatigiinnut marsimi qinersisoqarmat taanna qinigaavoq.
