Ataatsimiisitsinerit ornigarneqarpallaanngitsut

- Ataatsimiinnerni takkuttut ajoraluartumik ikipput, suliffeqarfiimmi minnerit avammut tunisassiornissamik eqqarsaatersuuteqartut ataatsimiinnerni saqqummiunneqartartut iluaqitigisinnaalluaraluarpaat, Mads Skifte, Nunatsinni Takornariaqarnermik Inuussutissarsiornermullu Siunnersuisooqatigiinni, GTE-mi, ineriartortitsinermut pisortaq oqarpoq, nangipporlu:

- Ataatsimiinnernut takkuttoqarpiarneq ajornera nikalluutigissanngilarput. Suliarput ingerlateqqissavarput. Suliffeqarfiit minnerit siunnersorusunnarput, Danmarkimi avammut niuernermi siunnersuisoqatigiit, Danmarks Eksportråd, suleqatigivagut, taakkulu aqqutigalugit suliffeqarfiit Kalaallit Nunaanniittut avammut tunisassiornissaminnut periarfissagissaarnerussapput, Mads Skifte oqarpoq.

Suliffeqarfiutilinnik ataatsimiisitseqattaarnerit Danmarkimi avammut niuernermi siunnersuisooqatigiit, Nunanilu Avannarlerni suliniutinik avammut niueqatigiinnermut aningaasaateqarfik, NOPEF, suleqatigalugit ingerlanneqarput.

Ataatsimiisitsinerit Katuami ataasinngormat aallartipput, taamatuttaaq Hotel Maniitsumi pingasunngormat ataatsimiittoqarluni. Sisimiuni ippassaq aamma ataatsimiittoqarpoq, kulturip illorsuani Taseralimmi ataatsimiinneq ingerlanneqarluni.

Ilulissani ataatsimiisitsinerit unnugu naammassineqassapput, tamanut ammasumik Ilulissani Hotel Arcticimi.