Ataatsimeersuarnissaq pingaaruteqarluinnassasoq Brown isumaqarpoq
- Ukiuni tulliuttuni 50-ini silap pissusaanut politikkissap aalajangersaaffiginissaanut ullunik 50-inik piffissaqarpugut, Gordon Brown nunarsuatsinni nunat mingutsitsinerpaat 17-it aallartitaannut ullumi taama oqarpoq. Nunat taakku aallartitaat Naalagaaffiit Peqatigiinneersunik nunanillu ineriartortuneersunik Londonimi ullumikkut ataatsimeeqateqarput.
Silap pissusaa pillugu Københavnimi isumaqatigiissuteqarnissamut aqqutissiuussinissaq siunertaralugu taakku ullumi ataatsimeeqatigiipput.
Isumaqatigiissuteqartoqarsinnaanissaa, Brownip ilimagaa, taamaattorli isumaqarluni, tamatuma anguniarnissaanut maanna periarfissaasoq kingulleq, isumaqatigiinniarnerillu aallunneqarnerusariaqartut.
Isumaqatigiissuteqarnissaq nunarsuatta periarfissatuarigaa, Gordon Brown isumaqarpoq.