Ataatsimeersuarneq isumasioqatigiiffiuneruvoq

-Ataatsimeersuarneq pissanganaqaaq, aamma oqallinnerit sumut ingerlaniarnermut suniarnermullu tunngasut tikillattaarneqartarput, kisiannili sorliit immikkut sammissanerlugit erseqqissarneqanngilaq, Birgit Hansen oqarpoq, nangillunilu:

Soorlu ualigaa eqimattatsinni eqqartorparput imigassap ajornartorsiutaanerujussua sorpassuarnullu peqqutaanera, soorlu meeqqat sumiginnarneqartarnerannut. Pinaveersaartitsinissamullu iliuuseqajaarnissap, imaluunniit pinaveersaartitsinissap pingaaruteqassusia eqqartorneqarpoq, pingaartumik naartusut eqqarsaatigalugit.

Sunamiuna amigaatigigipput?

-Eqqartukkatta pingaarnersiorlugit tulleriiaarnissaat amigaatigaagut. Kalaallit Nunaat piitsuunngilaq aammali aningaasarpassuaqarnani, taamaammat iliuuseqarfissat toqqarnissaat pingaarsoraara, politikerillu tungaanniit iliuuseqarfissat pilersaarusiorfigineqarnissaat amigaatigaara, ungasinnerusumullu iliusissanik pilersaarusiornissaq amigaatigalugu.

Ataatsimeersuarneq una naammassigutsigu anguniagassanik suliaqartoqartariaqarpoq. Ataatsimeersuartoqaqqilerunilu anguniakkat taakkua allattukkut sumut killiffigisimanerlugit nalilerneqarlutik.

Tassa iliuuseqarfissagut anguniagalersortariaqarput, anguniakkallu nalilersuiffigisariaqarlugit aamma kingorna.

Ilaqutariit nukittuut anguneqarsinnaanngorpat imaluunniit inunnik isumaginnitseqarfimmiut manna ataatsimeersuarnerivaat?

-Inunnik Isumaginnitseqarfimmi sulisunut ataatsimeersuarneruvoq, inuppalaartussaagaluarluni isumaqarpunga tamanna anguneqanngitsoortoq, Birgit Hansen oqarpoq.

Peqataasorpassuit inunnik isumaginnitseqarfimmeersut ataatsimeersuarneq pissarsiffiulluartutut isigalugu nalilerpaat, ataavartumillu taamatut ataatsimeersuartinneqartariaqarlutik oqaatigalugu.