Ataasinngorpamiit angutit arsaallutik GM-lissapput

Sapaatip akunnerata uumap siuliata naanerani anngunniunnerit naammassimmata iligiit arfineq pingasut pissartanngorniuttussat anngupput.

Pissartanngorniunnissami peqataasussat arfineq pingasut tassaapput N 85 Narsamiit, K 33 Qaqortumiit, ukioq manna aaqqissuisut Nûk Nuummiit, B 67 aamma Nuummeersut, G 44 Qeqertarsuarmiit, Nagdlúnguak' - N48 Ilulissaniit, Malamuk Uummannamiit, kiisalu K'ingmek' 45 Upernavimmiit.

Piffissarlu qaninnerpaaq unammisussat puljenut agguataarnissaannut makitsisoqassaaq.

Arfininngormallu GBU-imi siulersuisuunerit ataatsimiinnerminni annguttut aggerfiisa agguataarnerat atuutiinnarneqassasoq aaliangiuppaat. Tassa Kujataanit annguttut ataatsimik ilaneqassasut, Qeqqani ataatsimik ilanngarneqassasut sinnerilu allannguuteqaratik.

Taamatut allanngortitsinermut pissutaasimavoq Qeqqani anngunniunnerni peqataasut holdit sisamaannaasimanerat, peqatigiiffit peqataasussaagaluit marluk takkutinngitsoormata.

Taamaalilluni GBU aaliangerpoq taarsiullugu iligiit ataatsit kujataaniit peqataasussanngorlugit.

Tamannalu Qeqqani peqataasunik naammaangittaalliutigineqarpoq akerliuffigineqarlunilu, taamaakkaluartorlu GBU-p turneringsudvalgianiit, Jens Mølgaard, nalunaarpoq allannguineq aaliangiusimaneqartoq.

Erseqqissaassutigineqarporlu arsaattartut kattuffiat aamma GBU-mik taaneqartartoq, Nunatsinni arsaannerup silarsuaani qullerpaatut inissisimasutut, GBU-p ataani ataatsimiititaliat innersuussutaannik allanngortitsisinnaammat, aamma taamaapppoq turnerings-udvalgip innersuussutaanik.

Kiisalu GBU-p sinerissami arsaattartut klubbii kaammattorpai aappaagu 2011-mi ileqquusumik ataatsimeersualerpat, 'turneringsreglement'-ip ullunut atuuttunut naleqqussarnissaanut siunnersuutissaqarunik, taamanikkussamut oqalliseqataaqqullugit.