Astrid Fleischer Rex IA-mut nuuppoq
Astrid Fleischer Rexip inatsisartunut marsip aqqaneq aappaani qinersinissami Inuit Ataqatigiit sinnerlugit qinigassanngortinnini ullumi ullup qeqqa qaangilaara avammut tusarliuppaa.
- Sivisuumik tamanna eqqarsaatiginikuuara. Maanna ukiut qulit politikeritut sulereerpunga Inuit Ataqatigiit kommunalbestyrelsimi Inatsisartunilu qanimut suleqatigisarlugit. Isumaqarpunga politikkikkut anguniakkakka IA-kkut eqqarsartaasiannut qanittuararsuusut, Astrid Fleischer Rex KNR.gl-imut oqarpoq.
Inatsisartuni ilaasortaanermini isumaginninnermut tunngasut qaqilertarpai ilaatigut ilungersuutigalugu kinguaassiutitigut atornerluinermi suliat pisoqalitsinngisaannarnissaat. Piffissami kingullermi qaqilertagai tassaanerupput assigiinngitsutigut atornerluisut atornerlugaasullu pitsaanerusumik ikiorneqartarnissaat.
- Isumaginninnermut tunngasut oqallisigineqarneranni parteeqatima akornanni oqaloqatissaaleqisarsimavunga. Taakkumi aamma sulianik allanik pingaarutilinnik ulapputeqartuaannaramik. Neriuppunga Inuit Ataqatigiit sinnerlugit qinigaasinnaassallunga tassanilu nalunngilara politikkikkut pingaartitakka pillugit immersoqatissaqarlunga, Astrid Fleischer Rex oqarpoq.
Maanna marsip aqqaneq aappaanni qinersinissami Inuit Ataqatigiit qinigassanngortitaasa akornanniilerpoq.
Astrid Fleischer Rex 58-inik ukioqarpoq, ilinniartitsisutullu ilinniarsimalluni. Inatsisartunut 2002-mili ilaasortaavoq, Nuup Kommuniaasimasumi, maanna Kommuneqarfik Sermersuumi kommunalbestyrelsimi saniatigut aamma ilaasortaalluni.
