AstraZenecap coronavirusimut akiuussusiornini iluatsinnersoq ukioq naatinnagu paasissagaa

Coronavirusimut akiuussutissaasinnaasumik misileraanerminni ukioq naatinnagu sukumiinerusumik ilisimasaqarnerulersimanissartik neriuutigalugu, nakorsaasiorfiup AstraZenecap pisortaanerata Pascal Soriotip sisamanngornermi oqaatigaa.

Nakorsaataasinnaasumilli misileraanerat sapaatit akunnerata massuma ingerlanerani unitsinneqarallartoq nangeqqinneqarsinnaanissaanut akuerineqassappat aatsaat taamaalisoqarsinnaassasoq, Sverigemiut Tuluillu suliffeqarfiata erseqqissaaatigaa.

Akiuussutissamik misileraaneq Tuluit Nunaanni inuup misileraanermi peqataasup nassuiaatissaqanngitsumik napparsimalernera pissutaalluni unitsinneqarallarpoq.

Nakorsaasiorfiit arlallit coronavirusimut akiuussutissamik misileraaleruttorput, taakkunanngalu nakorsaasiorfiit arlallit misileraanerminni immikkoortut pingajuannut killereerput, misileraanerit naammassiartorlutik. AstraZenecap misileraanini taamaalinerani unitsikkallarpai.

Misileraanermi peqataasoq qiteqqamigut aseruuttoormat misileraanerit unitsinneqarallarput. Qiteqqakkut aseruuttoorneq qaqutigoortorujussuuuvoq.

AAMMA ATUARUK Coronavirusimut akiuussutissamik misileraaneq unitsinneqarallartoq

Nakorsaataasinnaasumik misileraanerit unitsinneqarallartarnerat takornartaanngitsoq Soriot-p oqaatigaa, unitsitsigallarnerup uuma allaanerussutigiinnarpaa nunarsuarmi nunat tamalaat malinnaammata.

AstraZenecap coronavirusimut akiuussutissatut nakorsaataata isumalluarnartuunera, Naalagaaffiit Peqatigiit peqqissuunissaq pillugu suleqatigiiffiata WHO-p siusinnerusukkut oqaatigereerpaa.

Akiuussutissat ineriartortinneqareerpata 300 millionit EU-p AstraZenecamit pisiarereerpai, taassumallu saniatigut 100 millioninik ilasinnaanissaat aamma isumaqatigiissutigineqarluni.