Assit qangarnitsat Sisimiuni saqqummersippaat

Saqqummersitsinermi siullermi saqqummersinneqarput, Sisimiuni assit Jette Bangimit assilineqarsimasut.

Assitoqqat maanna saqqummersinneqartut niuertorutsimit Torben Krogh-imit assilisaapput, taanna ukiuni 1947-miit 1972-imut Sisimiuni najugaqarsimavoq assillu allat igasumit, Poul Madsenimit assilisaallutik. Poul Madsen Sisimiunut tikippoq ukioq 1948-imi, aallarlunilu 1963-imi. Poul Madsenip ilisimaneqaatigaa, illoqarfimmi spejderinik aallartitsisuunini.

- Assitoqqanik saqqummersitsinerup siunertaasa ilagaat, inuit assilineqarsimasut kikkuunerinik paasisaqarnissaq, taama oqaluttuarpoq Sisimiuni Katersugaasiviup pisortaa, Olafur Rafnar Olafson.

Kikkut assitoqqani assilineqarsimanersut kinaassusersineqarnissaat ajornartorsiutaagunanngilaq.

- Katersugaasivik ippassaq ullaap tungaa suli ammanngitsoq, inunnik utoqqasaanik silaterput ulikkaareerpoq, katersugaasiviup pisortaa oqarpoq.

Assitoqqat saqqummersinneqartut ikiup uuma naanissaata tungaanut takuniarneqarsinnaapput.

Assiliivimmik assilisat tulliit saqqummersinneqartussat tassaassapput, ukiuni kingulliunerusuni assilisat, ilaatigut digitalimik assilisat ilanngunneqassallutik.