Nannumik saassunneqartoq: Niaqora qaqqoriaraluarpaa

Nanoq pualananilu sanngiitsoq umimmannianik Ikerasammeersunik pingasunik sisamanngormat kingullermi saassussisuusimavoq.
Ole Kristensen (saamerleq) soraluaalu Samuel Kristensen (talerpilleq) piniartut pingasut nannumik Uummannap avannaani saassunneqartut ilagaat. Assi © : Privat
Uani takuneqarsinnaavoq Ole Kristensenip uluaani nannumik niaqqumigut kiitinnermi kingorna ikia. Assi © : Privat
Ole Kristensenip soraluaa Samuel Kristensen nanoq qungasiatigut aalajangeqqallugu niaqumi tunuatigut qittutsippoq. Assi © : Privat
Samuel Kristensen kiinnami saneraatigut nannumik qungasiatigut tigummitilluni qittutsippoq. Assi © : Privat
Ole Kristensen nannumit niaqqumigut kiineqarnermini aamma siutimigut annikitsumik ikilerneqarpoq. Assi © : Privat
Allattoq Kathrine Kruse
septembarip 20-at 2019 15:35

Umimmanniat pingasut Uummannap eqqaani Ikerasammeersut Uummannap Avannaani Uumiviup qinnguani umimmattaminnik aattortillugit nannumit kaattumit sapaatip akunnera kingullermi saassunneqarput.

Umimmanniat saassunneqartut umimmattamik qungasia peerniarlugu passutileruttorlugu nannumit pakasarneqarput. Nanormi passussiffimminnit 2 imaluunniit 3 meterit missaani nikorfasoq malugilerpaat.

- Tunumut qiviarlunga nikuissimasoq siulleersuani nakkartissimallugit takuara. Nikuikkama qummut isigaara, Ole Kristensen 173 centimeterisut angitigisoq oqaluttuarpoq.

Taamaalinerani Ole Kristensen allatut iliuusissaarulluni nanoq utaqqiinnalerpaa.

- Pateriaraluarpaanga uniorlunga. Naluara attorneraanga. Kingornatigut aatsaat paasilerpara attutsiarsimagaanga, Ole Kristensen oqaluttuarpoq.

Piniartup niaqua kisiat persarigaa

Saassunneqarnerminnit sapaatip akunnera missaa qaangiuttoq pisimasoq oqaluttuaraa. Piniartut saassunneqareerlutik aamma aatsaat aqaguani angerlamut apuupput. Kisianni misigisimavoq puigugallassanagu.

Nannup Ole Kristensen pateriareeramiuk nunamut uppisippaa niaqualu niaqquminik qanillattulerlugu.

- Niaqorsua niaquma tungaanut aallarmat talera talerpilleq tunniukkaluarpara. Taanna pinngivillugu niaqukkut kiilillarmanga niaqora nunamut tutsilluariaannarakku eqqarsarlunga annikinnerusumik ajortumiissagaanga. Taamaalillunga iluatsitseqqagunarpunga, Ole Kristensen oqaluttuarpoq.

Pisoq piffissap sivikitsup iluani pisoq Ole Kristensen oqaluttuarpoq. Taannalu nannumit niaqqumigut kiitinnerminit nannup tuloriaanit ulussamigut siutimilu illuatigut annikitsunik ikilerneqarpoq.

- Qaqqoriavissorunaraluaramiga. Una nanoq sanngiikkami pualananilu, Ole Kristensen oqaluttuarpoq.

Ole Kristensenilu nannumit niaqqumigut kiineqareerluni nikeqqinngimmat nannup Ole Kristensenip soraluaa 58-nik ukiulik, saniannilu nikorfasoq, saassuppaa.

Seqqorlugu qimaatikkaat

Ole Kristensenillu soraluaata, Samuel Kristensenip, nanoq qungasiatigut taliminik illuttut aalajangerpaa, taamaalineranilu piniariaqataasup pingajuata aallaat tiguaa nannullu tungaanut seqqorluni.

Nanorlu seqqorneqarami seqqortumut saassussinialerpoq, aallaasillilli nanoq qimaatissinnaasimavaa.

- Seqqoqqikkamiuk siulliivata missaatigut aallaagunarpaa, Ole Kristensen oqaluttuarpoq.

Nanoq tamatuma kingorna immap tungaanut qimaavoq takuneqaqqinnanilu.

Piniariat saassuneqareernermik aqaguani aatsaat Ikerasannut apuupput, tassanngaanniillu politiinut nalunaaruteqarput. Nalunaaruteqarnerminni qanoq pisoqarsimanera paasissutissiissutiginiaannarpaat, kisiannili politiinit nakorsiarnissaminnut kaammattorneqarput, tamarmillu aamma taamaaliorsimapput.

Nannumillu saassunneqaleraluarnerminni umimmak aattungartik angerlamut apuussimavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq