Assit itsarnitsat nalissaqanngitsut
Thomas Neergaard Krabbe 1861-imit 1936-ip tungaanut inuusoq nakorsatut ilinniarsimavoq, timmissanut tunngasunik immikkut ilinniagaqarluni assiliisartuullunilu.
Nunatta sineriaani inuit inooriaseqarnerat qanoq assigiinngitsiginersoq Krabbep assilisaata ersersippaa.
Ammassalimmit Uummannamiillu assit ingammik alutorineqarput, tassami taamani inuit sumiiffinni najugaqartut assiliinerup nalaani avataanit suli annertunerusumik sunnertissimanngillat, Nunatta Katersugaasivia Allagaateqarfialu tusagassiorfinnut nalunaarummi taama allapput.
Igalaamerngit assinik qalipaateqanngitsunik qalipaasersuiffiit aamma saqqummersinneqarput.
Katersugaasivimmukartut qalipaanermik periuseq atorneqartoq aamma takusinnaavaat. Assit qalipaateqanngitsut qalipaasersornerini assilissat allanngortarput, takutinniarneqartorlu allatut uumassuseqalertarluni.
Taamaalineranilu assiliaq piviusumit allaanerusoq, takorluuinerusorlu pilersarpoq.
Nunatta Katersugaasiviani saqqummersinneqartut oktobarip 18-iata tungaanut takuneqarsinnaapput.
