Assit: Ataatsimiinneq nuissernerani siallerneranilu aallartinneqarpoq
Naalakkersuisuni Inatsisartunilu ilaasortat Nuutoqqami Hans Egedep Illuani tallimanngornermi ullaakkut ullaakkorsioqatigeeriarlutik ukiakkut ataatsimiinnerup aallartinnissaanut piareersarput.
Ilaasortalli assilisittussanngormata siallernera pissutigalugu illup iluaniiginnartariaqarput.
Ullaakkorsiornerup assilisinnerullu kingorna Annaassisitta Oqaluffianut ingerlaaqatigiinnissamut piareerput.
Oqaluffimmi nunatta biskoppia, Sofie Petersen politikerinut naalagiartitsinissaminut piareersimavoq.
Oqaluffimmi corona pissutigalugu malittarisassaqarpoq, taamaammat issiaviit tullii inoqanngillat.
Inatsisartuni ilaasortat imminnut ungasillisimaarlutik aamma issiapput.
Naalakkersuisut siulittaasuat, Kim Kielsen (S) aningaasaqarnermut naalakkersuisoq, Vittus Qujaukitsoq (NQ) inuussutissaqarnermut aatsitassanullu naalakkersuisoq, Jens Frederik Nielsen (D) aamma aalisarnermut, piniarnermut nunalerinermullu naalakkersuisoq, Jens Immanuelsen (S) issiavinni saarlerpaani issiapput.
Issiaviit illuatungaanni, Inatsisartut siulittaasuat, Vivian Motzfeldt (S) siulittaasup tullii, Mimi Karlsen (IA) Justus Hansen (D) aamma Peter Olsen (IA) issiapput.
Nunatta biskoppia, Sofie Petersenip ukiuni 25-ni atuuffimmineereerluni soraarninngorniarluni aalajangerpoq. Biskoppissamik nutaamik taasineq suli naammassinngilaq. Biskoppi nutaat novembarip ulluisa 22-anni atuutilersinneqassaaq, tamanna Nuummi Hans Egedep Oqaluffiani pissaaq.
Tamanna Sofie Petersenip polikerinut naggataasumik naalagiartitsinissaanut periarfissiivoq.
Biskoppip oqalugiarnerata tussiarnerillu kingorna Inatsisartut ataatsimiittarfiannut ingerlaartoqarpoq.