Assiliisartoq assissaqanngitsoq
Taanna pinngortitamut avatangiisinullu naalakkersuisumit Anthon Frederiksenimit avatangiisinut tunngasumik ullumi nersornaatisissaaq.
Carsten Egevang minnerunngitsumik imeqqutaallat ingerlaartarfiinik misissuinini pillugit ilisimaneqarpoq, maannalu atuakkamik assilisaminik kusanartunik saqqummersitseqqammerluni, taaguutilimmik "Grønland - Dyrenes og Mennskenes Land", kalaallisut taasinnaasarput: "Kalaallit Nunaat - Uumasut Inuillu Nunaat".
Nersornaasiinermut tunngavilersuutiminni Namminersorlutik Oqartussat allapput, Carsten Egevangip timmissanik uumasunillu assilisamigut - aamma Issittumi inuit pinngortitamik atuinerat - Nunatsinni Danmarkimilu inunnut takusassiarigai, taamaalillunilu pinngortitamik avatangiisinillu ilisimanninnerulersitsilluni.
Carsten Egevang Namminersorlutik Oqartussat pinngortitamut avatangiisinullu 2011-mi nersornaasiineranni pingajussaatut nersornaasigaavoq. Nersornaaserneqareersut marluk tassaallutik tv-kkut aallakaatitassiortartoq Niels-Henrik Lynge aamma Tasiusami unnuisarfimmik piginnittut Jørgine aamma Otto Frederiksen. Taakku tamarmik 20.000 koruuninik aningaasartalimmik nersornaatisipput.