Assiliartaliisussanngortinneqarami tulluusimaarpoq

Eqqumiitsuliortup, assiliartassanillu titartaasartup, Naja Abelsenip, aningaasassatsinni assitaliussinissani nuannaarutigeqaa, tulluusimaarutigeqalugulu.

Aningaasassatsinni assissanik titartaasussanngortinneqarnerminik Naja Abelsen Namminersornerullutik Oqartussanit ataasinngormat ilisimatinneqarpoq, ataqqinaatitullu tamanna isigaa:

- Igaffimmiitillunga paasivara, ernermalu quiasuutigeqisaannik qitaasartuinnanngorlunga.

Suliakka ullup sinnerani unitsiinnarpakka, timerami adrenalinersuarmik eqqissisimasinnaajunnaaqqalermat. Imminut eqqissisarniarlunga uffarpunga, Naja Abelsen oqarpoq.

Aningaasat pappiaraasut muminganni nunatsinni uumasut titartagaliunneqassapput.

Nunatta qaqqai aalajangersimasut, qaqqallu oqaluttuassartai Naja Abelsenip aningaasat saqqaanni titartassavai.

Qaqqat pineqartut tassaapput Upernaviup eqqaani Kullorsuaq, Uummannap Qaqqaa, Nuup kangerluaniittoq Pisissarfik, kujataani Killavaat, kiisalu Tasiilap akianiittoq qaqqarsuaq inngigissoq.

Naja Abelsen isumaqarsimagaluarpoq eqqumiitsuliortut allat peqatigalugit titartaasussaalluni, taamaattoqanngitsorli paasigamiuk tupaallaqaaq:

- Eqqumiitsuliortut allat peqatigalugit sulisussaasorisimagaluarpunga, allatulli eqqarsartariaqalerlunga, kisianni suleqatigiilluta aningaasat assitalersussavavut. Tassami Naalagaaffiup aningaaserivissuani sulisut pilersaarusioqatigissavakka, Namminersornerullutillu Oqartussat suleqatigilluinnartussaallugit, Naja Abelsen oqarpoq.

Suleqatigiissitat sapaatip akunnerata tulliani nunatsinnukassapput, pilersaarusiornerlu aallartissalluni.

Aningaasat nunatta qaqqarsuinik assitallit qaqugu saqqummersinneqarnissaat ilisimaneqanngilaq, suliaq annertuujussammat.