Assigiinngitsunik patsiseqarput
Attartortuunermiit piginnittunngortarnermut, illunik akikitsunnguanngorlugu pisititsisoqartarsimaneranut atatillugu, sukumiinerusumik misissuititsisoqarnissaa IA-mit demokratinillu piumasarineqarpoq. Misissuititseqqusinermullu IA-mit demokratinillu patsisilersuutaasut assigiinngillat:
Inuit ataqatigiinneersoq Johan Lund Olsen, aamma nammineerluni illumik akikitsumik pisisimasoq ima oqarpoq:
- Inuit Ataqatigiinninngaanniik piumasarisimavarput sukumiinerusumik misissuititsisoqarnissaa, nammineerlunga aamma piumasaraara, Johan Lund Olsen oqarpoq nangillunilu: - Kukunersiuinermut ataatsimiisitaliaq taamatut inatsisinik misissuititseqqissaarnissamut periarfissaqareerpoq, aamma qanorluunniit amerlanerussuteqartut oqaraluarpataluunniit misissuinissaq pisariaqanngitsoq. Inatsit malillugu kukkunersiuinermut ataatsimiisitaliaq misissuititsisinnaavoq. Namminersornerullutik oqartussat misissuititsissagunik attuumassuteqanngiivissunik misissuititsissaaq.
Demokratineersoq Lene Knúppel isumaqarpoq, ineqarnermut pisortaqarfiup misissuititsisimanera atorsinnaanngitsoq: - Inatsisilerituut Namminersornerullutik Oqartussanut attuumassuteqanngitsut misissuitinneqarnissaat demokratininngaanniit piumasaraarput, paasineqartariaqarpormi Namminersornerullutik Oqartussani pisortat arlallit illunik pisitinneqarnerini, ilumut inatsisit eqquutsillugit ingerlasoqarsimanersoq. Ineqarnermut pisortaqarfiup misissuititsisimanerata kingorna nalunaarusiarineqartoq, isumaqarpugut imminut misissuiffiginerusoq, taamaammat attuumassuteqanngitsut misissuitinneqarnissaat demokratininngaanniit piumasaraarput, Lene Knúppel oqarpoq. Inuit ataqatigiinneersorlu Johan Lund Olsen ima tamanna pillugu oqarpoq.
- Taanna qularineqarpat taava maannakkut sukumiilluinnartumik misissuititsisoqartariaqarpoq.
Illunik akikitsunik attartortuunermiit piginnittunngorsinnaanermut aaqqissuussineq atuutilerpoq 2002-mi. Taamanimiillu illut pisiarineqarsimasut 80-it missaannik amerlaassuseqartut tunineqarsimapput. Johan Lund Olsen aamma oqarpoq nutaamik misissuititsinissami nammineq ernumassutissaqarnani.
