Nuuk Assigiinngisitaartuuneq Multi-Kulti 2018-imi sammineqassaaq
Soorlu atiata nalunaareeraa, illoqarfiit pingaarnersaanni kulturikkut nunarsuarmit ungasissumeersunit allaat assigiinngissitaartuuneq sammineqassaaq.
Katuamiittumi NAPA-mi Kulturisiornerit tallimanngornermi aallartinneqassapput ilaatigut tusagassiortutoqarsuaq Stephen Helimann oqaluttuanik Nunanit Avannarlerneersunit atuffassisoq tusarnaarneqarsinnaalluni.
Nuuk Centerip isaariarsuani arfininngornermi nunarsuup assinganik nivinngaasoqassaaq, maaniittullu suminngaanneernertik tassani nalunaarsinnaavaat, aammalu nunarsuarmi ornikkusutatik sumiinnersut nalunaarlugit. Centerip sutorniartarfiata imeruersaatit aalakoornartortaqanngitsut Multi-Kulti drinksit aamma sassaalliutigissavai.
Atuakkanik atorniartarfimmi oqaluttuanik pikkunartunik nunarsuarmi tamarmeersunik atuffatsittoqarsinnaavoq, Nuutoqqamilu katersugaasivimmi kalaallisuut assigiingitsut inuiaqatigiillu assigiinngitsut assuutaasa assingi meeqqanit qalipanneqarsinnaallutik.
Nuummi Eqqumiitsulianut katersugaasivimmi Nuummi Agiartartoqatigiit tusarnaartitsilerpata Disneyp aamma Elvisip erinarsuusiaat tusarnaarneqarsinnaapput.
Innuttaasut Illuat Nuussuarmiittoq sapaatiuppat nerisassanik mamartulianik sassaalliuteqassaaq; tassanittaaq qalipaasoqarsinnaavoq filmertoqarsinnaallunilu.
Kommunip ukiup aappassaa kulturikkut assigiinngissitaartuuneq ukkataralugu nalliuttorsiutigaa.
