Assartuussinermi akit qaffassanngikkallarput

Nioqqutissanik umiarsuartigut assartuussinerup akiisa qaffanneqarnissaannik, Royal Arctic Line-p ilimasaarinera erngiinnaq atuutilersinneqarsinnaassagunanngilaq. Royal Arctic Line-p akinik qaffaaniarnini februaarip aallaqqaataaniit, tassa aqaguminngaannit, atuutilersussatut Naalakkersuisunut siunnersuutigigaluarpaat, Naalakkersuisulli siunnersuutip atuutilersinnissaanut suli piareeqqarpasinngillat.
Allattoq Apollo Jeremiassen
februaarip 03-at 2014 06:18

Royal Arctic Line-p sullitani suliffeqarfiit angisuut, soorlu Pisiffik, Kalaallit Nunaanni Brugsenit, Polar Seafood allallu assartuussinermik pisariaqartitsisut, pingasunngormat ataatsimeeqatigaat. Umiarsuaatileqatigiiffiup aningaasaqarnerata maanna inissisimanera aallaavigalugu, akit assartuussinermut maanna akigitsinneqartut qaffanneqarnissaat qanoq pingaaruteqartigisoq, ataatsimeeqatigiinnermi paasissutissiissutineqarluni.

Assartuussinermili akit qaffaneqarsinnaanerannik Naalakkersuisut aalajangiisimanersut, ullumi tallimanngornermi tusarfigineqanngillat. Naalakkersuisut tamassuminnga aalajangiisimannginerat sumik pissuteqarnersoq ilisimaneqanngilaq.

Radioaviisip paasisaat naapertorlugit, assartussinermi akit aqagumiit qaffannissaat atuutilersinneqarsinnaassanngilaq. Tassami akinik qaffaasoqassappat, Royal Artic Line aamma Naalakkersuisut akornanni tamanna aatsaat isumaqatigiissutigineqaqqaassaaq. Aamma qaffaanissap siunersuutigineqarneranut Naalakkersuisut attuumassuteqartut, tassalu Attaveqarnermut Naalakkersuisoq, Steen Lynge, Aningaasaqarnermut Naalakkersuisoq, Vittus Qujaukitsoq aamma Inuussutissarsiornermut Naalakkersuisoq, Jens Erik Kirkegaard, qaffaanissamik isumaqatigeeqqaartussaassapput.

Royal Arctic Line-p assartuussinermut akinik 10 procenti tikillugu qaffaanerani, eqqorneqartussaassapput suliffeqarfiit angisuut aamma Namminersorlutik Oqartussanit piginneqataaffigineqartut suliffeqarfiit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq