Assartukkanut akit sinneqartoorfiusut

Royal Arctic Linep sinneqartoorutai 2014-imut naleqqiullugit siorna 2015-imi amerlanerupput, akileraarnermi pitinnagu 91 millionit koruuninik sinneqartooruteqarami. Royal Arctic Line tusagassiuutinut nalunaarummi taama ilaatigut allaaserisaqarpoq.

Aamma atuaruk RAL-ip amigartoorsimaneq sinneqartoorninngortippaa

Tamanna malunnaatilimmik siuariarnerusoq umiarsuaatileqatigiiffiup nalunaarutigaa, 2014-imimi sinneqartoorutit 33 millionit koruuniummata, 2013-ilu qiviaraanni amigartoorutit 20 millionit koruniullutik.

Naak kujammut assartukkat 2014-imi 4 procentinik ikileriarsimagaluartut assartukkat tamakkiisumik isigalugit amerlisimanerat ilaatigut pissutaavoq.

Aamma atuaruk Royal Arctic Linep amigartoorutini affaannanngortikkai

Assartukkanut akit siorna marsip aallaqqaataani atuutilersutut akuerisaasumik qaffanneqarnerat, angalariaatsillu 9/12-imik taaguutillip 2015-ip aallartisimalaarnerani eqqunneqarnera pitsaasumik aamma sunniuteqarsimapput.

Orsussamut akit ineriartornerat pissutaallutik, matumani uuliap nappartamut akikilliartornera pissutaanerpaalluni, aningaasartuutit ikilinerannik malitseqarsimasut Royal Arctic Linep nalunaarutigaa.

Umiarsuaatileqatigiiffiup angusai siulersuisunit naammagisimaarneqarput.

Aamma atuaruk RAL ukiuni 19-ini siullerpaamik amigartooruteqartoq