Assartuinermut ataatsimiititaliaq pilersinneqalerpoq
- Kalaallit Nunaannut tunngassuteqartunut Kalaallillu Nunaata aningaasaqarniarneranut tunngassuteqartunut ilisimasaqarluartut arlaannaannulluunniillu pituttorsimanngitsut ataatsimiititaliami ilaasortaanissaat pingaartissimavarput, Angallannermut, attaveqarnermullu naalakkersuisoq Jens B. Frederiksen oqarpoq.
Assartuinermut ataatsimiititaliami kikkut ilaasortatut toqqarneqarsimanersut Jens B. Frederiksenip oqaatigisinnaanngikkallarpaa, ilaasortassat Naalakkersuisunit akuerineqaqqaartussaammata.
- Angallannerup ilusissaa sorleq aningaasaqarniarnitsinnut akilersinnaanerunersoq paasiniassavarput, siunissarlu ungasinnerusoq eqqarsaatigalugu angallannermut tunngasunut politikkeqarnissaq, Assartuinermut ataatsimiititaliaq aqqutigalugu pilersikkiartuaartinneqassaaq. Tamanna pingaartipparput, Jens B. Frederiksen oqarpoq.