Assammik arsartarneq nunatsinni Danmarkimilu assigiinngissutilerujussuuvoq
Kalaallip assammik arsartartup, Jakob Larsenip, Danmarkimi arfininngormat pissartanngorniunnermi, marloriarlutik unamminissaminni unammineq siulleq ingerlanneqarmat klubbia GOG-Svendborg, ajugaavoq. Tulliani unammeqqilerunik naligiiginnassagunik ajugaaqqikkunilluunniit Damarkimi pissartanngortussaassapput.
- Danmarkimi assammik arsartarneq Kalaallit Nunaannut assammik arsartarnermut sanilliullugu assigiinngissutilerujussuuvoq, nunatsinnimi ukiumut ataasiaannarluni unammersuartoqartarpoq, Jakob Larsen oqarpoq:
Qallunaat assammik arsaattarnerat ukiuni kingullerni qulini aningaasarsiutinngortikkiartuaarneqarsimavoq. Assammik arsaqatigisartakkama amerlanersai arsartarnerminnik aningaasarsiuteqartuupput, ilai ullup affaanik suliffeqarsinnaasarput ilagullu saniatigut atuaatigisinnaasarlutik uanga aamma atuaatigalunga assammik arsartartuusimavunga. Assammik arsaattartuuneq piffissarujussuarmik tigusisarpoq ingammik Europa Cup-imut ilaalluni angalaqattaarnar-torujussuusarmat. Kalaallit unammisartuinut ilaalluni aamma nunanut allanut aallaqattaarnerit ingerlattarpavut. Taamatut unammiaqataartarluni allatulli saniatigut suliffeqarniarneq ajornarpoq.
- Aperineqarami - Kalaallit Nunaanni kiisalu Danmarkimi assammik arsaattarnerup suut assigiinngissutiginerai? Akivoq.
Danmarkimi sap. Akunneranut ataasiarluta unammisarpugut, kiisalu klubbera GOG, Europa Cup-imut unammiaqattaartussaatillugu, sungiusartuartaria-qartarpugut, piumasaqaatit naammassiniarlugit, Kalaallit Nunaanni ukiumut ataasiaannarlutik unammersuartarput ulluni 5-ni, 6-ni. qasujaatsuunissaq piumasaqaataaneq ajorpoq, ataasiaannarlunimi ukiumut unammersuartaraanni siunertaqarluartumik sungiusarnissaq ajornakusoortarpoq. Kalaallit Nunaanni qaammatini marlunni pingasuni siunertaqarluni sungiusartoqartarpoq, Danmarkimi Europamilu qaammatini qulini sungiusarneq ingerlanneqartarpoq. Taamaattumik Danmarkimi Kalaallillu Nunaanni assammik arsartarneq assigiinngissutilerujussuuvoq.
Taama oqarpoq GOG-mi arsaattartoq, Jakob Larsen, GOG-p sisamanngorpat appassaanik ajugaaniutivinnissami unammeqqissavaa Viborg.
Arfininngormat siullermik unammigamik GOG ajugaavoq 30-24. GOG sisamanngorpat ajugaaqqissappat Jakob Larsen pingajussaa Danmarkimi mesterinngoqataassaaq.
