Assammik arsarneq: VM-mut anngunniulluni unamminermi siullermi kalaallit ajorsarput
Sapaammi unnukkut kalaallit angutit assammik arsartartut VM-mut anngunniulluni unamminermi siullermi Mexico City-mi pisumi USA-mut ajorsarput.
USA 36-28-mik ajugaavoq muminnermi 14-19-mik kalaallit kinguaqqareersut.
Sulili kalaallit VM-mut anngunniunnermi finalemut anngunnissamut periarfissaqarput iligiillu ataasiinnaat aappaagu Sverigemi Polenimilu VM-rtoqarnissaanut anngussinnaapput.
Kalaallit pinngitsooratik Cuba-mut unnugu marlunngornermilu unnukkut Mexicomut ajugaasariaqarput.
VM-mut angunniunnermi iligiit peqataasut sisamaasut unamminerni aallarniutaasuani ataasiarlutik imminnut unammisussaapput inissilluarnerillu marluk finalemi sisamanngornermi unnukkut unammissapput.
2007ip kingorna assammik arsarnermi VM-ip naggataarnerani peqataanikuunngillat, naak arlaleriarlutik anngutingajattaraluarlutik.
Anngutingajannermi kingullermi 2018-mi Nuummi Inussivimmi bronzennanniunnermi unammineq sivitsorneqareersoq Chile auugaalluni VM-mut annguppoq.
Tamatuma kingorna aaqqissuussineq nutaaq atuulermat amerikap avannaamiut Caribiamiullu immikkut anngunniuttalerput nunallu pikkorissorsuarnik unammisartullit amerikap kujataamiut Argentina aamma Brasilia allami anngunniuttalerlutik.
VM-mut anngunniunnermi unamminerit tamarmik toqqaannartumik KNR-TV-mi aallakaatinneqassapput.
