Assammik arsarneq: Kalaallit VM-qataatitassaat ukuupput

Arsartut pingasut Danmarkimi najugallit 13-nillu Nunatsinni najugalittut nalunaarsorsimasut arnat assammik arsarnermi nunanut allanut unammisartuinit sianerfigineqareerput.

Taakkuuppummi arnat augustimi VM-mut anngunniutilerpata Nunarput sinnerlugu unammiartoqataasussat.

Tassami Amerika avannarlermiut Caribiamiullu decemberimi Spaniami VM-qarnissaani inissaq ataaseq unammissutigissavaat ukioq sinnerlugu unammersuarnerpassuit coronamit uninngatitaareersut. Pissutsit taamaannerisa unammisussat arsariaatsikkut imminnut marseqattaannissaat ajornakusoornerulersippaat.

Eqqoriaruminaappoq

- USA malittareqqissaarparput taakkulu iligiit nutaat imminnut sungiutsinniarsarviaat nunanut allanut unammisarnikkut. Nunalli assigiinngitsut corona qanoq akornutigisimatigineraat suli naluarput, nuna tamakkerlugu sungiusaasoq Anders Friis KNR-mut oqarpoq.

- Aamma amerikamiut arsartui sungiusaasuallu oqaloqatigigaangakkit malugisarpara oqaluttuarnaversaaqqissaartut. Piareersarnitik qanoq ingerlasimanersut oqaluttuarerusunneq ajorpaat, Anders Friis oqarpoq.

Kalaallit piareersarniarnerat aamma eqqugaavoq ilimanarporlu nunat allat peqataasussat aamma taamatut eqqugaasimassasut.

- Piareersarniarnitsinni atugassarisavut pitsaanerpaajunngillat aammami nunat allat taamaassimassapput, Anders Friis oqarpoq.

- Qanoq ilimasuuteqarnissaq nalorninartorujussuuvoq allanut naleqqiulluta qanoq inissisimanerput nalugatsigu aamma unammisassatta qanoq inissisimanerat nalugatsigu, Anders Friis oqarpoq.

Taamaattoq isumaqarnerarpoq Cubap peqataaniarunnaarneratigut unammersuarnermi kalaallit ajugaasuunissaannut periarfissaqanerulersoq.

USA-mi Chicagomut unammiartorluni aallarnissaq sioqqullugu Kalaallit unammisartut Danmarkimi sungiusaqatigiissapput.

Kalaallit unamminerisa takutinneqarnissaat KNR-TV-mit sulissutigineqarpoq.